— А між тым гэта быў час сур’ёзных сацыяльна-палітычных трансфармацый і напружанай заканатворчай дзейнасці. І беларускія дэпутаты былі самымі актыўнымі ўдзельнікамі гэтых працэсаў. Самай значнай падзеяй тых гадоў стала прыняцце сёмага кастрычніка тысяча дзевяцьсот семдзесят сёмага года новай Канстытуцыі СССР і ў наступным годзе — новай Канстытуцыі БССР. Усенароднае абмеркаванне праекта Асноўнага закона СССР насіла масавы характар, паступіла каля чатырохсот тысяч прапаноў і паправак. Упершыню былі прапісаны такія формы непасрэднай дэмакратыі, як усенароднае абмеркаванне і рэферэндум, вызначана прававое становішча народнага дэпутата, якое пашырыла ягоныя паўнамоцтвы ў пытаннях эканамічнага і сацыяльнага развіцця краіны. Таксама былі замацаваны правы на ахову здароўя, выбар прафесіі, жыллё, карыстанне дасягненнямі культуры, свабоду творчасці.