​​🙏На тэлеканале «Беларусь 3» тэматычны эфір да Міжнароднага дня памяці ахвяр Халакоста і Дня завяршэння блакады Ленінграда

Распачне тэматычны тыдзень стужка Міхаіла Ромма “Звычайны фашызм”, у якой аўтар выкарыстаў трафейныя хранікальныя матэрыялы з кінаархіваў міністэрства прапаганды фашысцкай Германіі і асабістага фотаархіва Гітлера, аматарскія здымкі эсэсаўцаў. Даследванне прыроды ўзнікнення нацызму і таго, якую цану прыйшлося заплаціць за гэта “вынаходства” ідэёлагаў Трэцяга Рэйха, кінамастак палічыў сваім абавязкам зрабіць у часы (1965 г.), калі фашызм, здавалася, згінуў у нябыт, – у завяшчанне і перасцярогу нашчадкам.

Дакументальны цыкл “Хроніка Мінскага гета” студыі “Майстэрня Уладзіміра Бокуна”, які будзе паказаны з 23 студзеня, у чатырох эпізодах распавядзе трагічную гісторыю яўрэйскага гета і гераічнага падпольнага супраціву ў самым цэнтры беларускай сталіцы, а таксама ў іншых гарадах краіны падчас нямецка-фашысцкай акупацыі.

З аўторка па пятніцу – эпізоды дакументальнага цыкла “Памяць зямлі маёй” тэлеканала “Беларусь 3”, якія распавядуць пра мемарыялы “Дальва”, “Дзецям – ахвярам вайны”, “Трасцянец”, “Яма”, іх значнасць і гістарычны кантэкст стварэння.

У памятны дзень 27 студзеня ў эфіры прагучыць сімфонія № 7 “Ленінградская” Дз. Шастаковіча ў выкананні Дзяржаўнага акадэмічнага сімфанічнага аркестра Рэспублікі Беларусь і Сімфанічнага аркестра Белтэлерадыёкампаніі.