કેટલાક જોડાક્ષરોની બાબતમાં એ ક્યા વર્ણો ભેગા થવાથી બન્યા છે અને એ વર્ણો ક્યા ક્રમમાં આવે છે તેનો ખ્યાલ નહીં રહેવાથી લખવામાં ભૂલ થતી જોવા મળે છે. ઉદાહરણ રૂપે જોઈએ-
દ્ર-દૃ-ર્દ્ર – ઇન્દ્ર, ચંદ્ર, તંદ્રા, દ્રષ્ટા વગેરેમાં દ્ર (દ્+ર) છે; જ્યારે અદૃશ્ય, તાદૃશ્ય, દૃશ્ય, દૃષ્ટાંત વગેરેમાં ‘દૃ’ (દ્+ઋ) છે, તો આર્દ્ર, પ્રેમાર્દ્ર, સ્નેહાર્દ્ર વગેરેમાં ર્દ્ર (ર્+દ્+ર) છે.
દ્ધ-ધ્ધ – ઉદ્ધત, ક્રુદ્ધ, બુદ્ધ વગેરેમાં ‘દ્ધ’ (દ્+ધ) છે, જ્યારે અધ્ધર, સધ્ધર, જોધ્ધો જેવા કેટલાક શબ્દોમાં ધ્ધ (ધ્+ધ) છે.
દ્વ-ધ્વ – ઉદ્વેગ, દ્વાર, દ્વંદ વગેરેમાં ‘દ્વ’ (દ્+વ) છે, જ્યારે અધ્વર્યુ, ઊર્ધ્વ, ધ્વજ વગેરેમાં ‘ધ્વ’ (ધ્+વ) છે.
દ્ય-ધ્ય – અનવદ્ય, ગદ્ય, દ્યુતિ વગેરેમાં ‘દ્ય’ (દ્+ય) છે, જ્યારે અધ્યયન, આધ્યાત્મ, અધ્યાપક વગેરેમાં ‘ધ્ય’ (ધ્+ય) છે.
દ્મ-હ્મ-હ્ન-હ્ય – પદ્મ, પદ્મા, છહ્મ વગેરેમાં ‘દ્મ’ (દ્+મ) છે. બ્રહ્મ, બ્રહ્માસ્ત્ર, બ્રાહ્મી વગેરેમાં ‘હ્મ’ (હ્+મ) છે. ચિહ્ન, મધ્યાહ્ન વગેરેમાં ‘હ્ન’ (હ્+ન) છે. ગ્રાહ્ય, બાહ્ય, સહ્યા વગેરેમાં ‘હ્ય’ (હ્+ય) છે.