ઊંટનો એક સોદાગર મરી ગયો. તેના ત્રણ દીકરા હતા. તેણે વસિયતમાં લખ્યું કે તેના મર્યા પછી તેનાં કુલ ઊંટોમાંથી અડધાં ઊંટ મોટા દીકરાને મળે, એક તૃતીયાંશ ઊંટ બીજા દીકરાને અને નવમા ભાગનાં ઊંટ ત્રીજા દીકરાને મળે. મુશ્કેલી એ હતી કે ઊંટ 17 હતાં એટલે વસિયત મુજબ વહેંચાય તેમ નહતાં. દીકરાઓઓ ઝઘડવા લાગ્યા અને છેવટે ગામના ડાહ્યા માણસ પાસે ગયા. ડાહ્યા માણસે શાંતિથી સમસ્યા સમજી. થોડો વિચાર કરીને તેણે તેનાં ઊંટોમાંથી એક ઊંટને સોદાગરનાં ઊંટોમાં ઉમેર્યું. કુલ ઊંટ 18 થયાં. હવે તેણે વસિયત વાંચીને ઊંટ વહેંચવાનું શરુ કર્યું.
18ના અડધા 9 થાય, એટલે મોટા દીકરાને 9 ઊંટ આપ્યાં. 18ના એક તૃતીયાંશ 6 થાય, એટલે બીજા દીકરાને 6 ઊંટ આપ્યાં. 18નો નવમો ભાગ એટલે 2 થાય, એટલે ત્રીજા દીકરાને 2 ઊંટ મળ્યાં.
હિસાબ આ પ્રમાણે થયો: 9+6+2=17.
એક ઊંટ વધ્યું, તે ડાહ્યા માણસે પાછુ લઇ લીધું.
સાર: જીવનમાં દરેક સમસ્યાનો ઉકેલ હોય છે. તેની બે શરત છે: એક,18મું ઊંટ શોધતાં આવડવું જોઈએ. અહીં 18મું ઊંટ એટલે મધ્યમ માર્ગ. સમસ્યાનો મધ્યમ માર્ગ શોધતાં આવડી જાય, તો કોઈ પણ સમસ્યા ઉકલી જાય. બે, સમસ્યાનું સમાધાન હોય છે તેવો વિશ્વાસ જરૂરી છે. આપણને જો એમ લાગે કે ઉકેલ નથી, તો સમસ્યા ન જ ઉકલે...!
Every Problem has a solution. Just because we may not see it doesn't mean It's not there - Robin Sharma