કશું પણ સફળાપૂર્વક કરવા માટે, જો ઓછામાં ઓછા દસ વર્ષ સુધી ઘસાવા તૈયાર ન હોઈએ, તો આપણે તે કામને લઇને ગંભીર નથી. રાતોરાત સફળતા વર્ષો પછી આવે છે. કોઈ સફળ લેખક, ખેલાડી, આંત્રપ્રેન્યોર, કલાકાર કે પ્રોફેશનલ માણસ દસ-બાર મહિના મહેનત કરીને ત્યાં નથી પહોંચ્યો.
ફૂટબોલના શ્રેષ્ઠ ખેલાડી પેલેએ કહ્યું હતું કે સફળતા અકસ્માતે નથી આવતી. એ પરિશ્રમ, દ્રઢતા, અભ્યાસ, શીખવાની વૃત્તિ, બલિદાન અને વિશેષ તો કામ પ્રત્યેના અસીમ પ્રેમમાંથી આવે છે.
શ્રેષ્ઠતાનો શોર્ટકટ નથી હોતો. તેના માટે કામને સમર્પિત થવું પડે અને તેને લગતી તમામ નાની મોટી જટિલતાઓ સમજવી પડે. એવી માસ્ટરી ઓછામાં ઓછા દસ વર્ષના અનુભવ પછી આવે છે કારણ કે તેમાં રોજ તમે એક્સપર્ટ થતા જાવ છો, શીખો છો, અવરોધોના ઉપાય કેળવો છો, આવડતને ધાર કાઢો છો.
તમે વૈજયંતીમાલા કે પ્રભુ દેવાને મંચ પર નૃત્ય કરતા જોયા છે? કેવા પાણીના રેલાની જેમ અનાયાસ (effortless) નૃત્યની મુદ્રાઓ કરે છે! તેમના એ અનાયાસ નૃત્યની પાછળ દાયકાઓનો આયાસ (effort) કારણભૂત છે.
- Raj Goswami