القصيده للعليله عليها السلام
الشاعر علي محسن الفرطوسي

....

يمته إتعود إلي وتكحل العيون
وصيحن ياهلا بجيت هالضعون

حلم اتصوره وماراح عن بالي
هاي اني العليله وحلمي يبرالي
أبد ماأيست من جيت الغالي
حنين حسين ادري ويرحم بحالي

مامتعوده هيجي احبابي يبطون
وصيحن ياهلا بجيت هالضعون

****

ادري بالشمس لو سلمت ترجع
بنهار إجديد وبعالي السمه تلمع
ناضر عيني بدوربك تره توزع
هلبت نور منه بديرتي يطلع

كواكب ال هاشم مايغيبون
وصيحن ياهلا بجيت هالضعون

****

تسبيحة عشگ خل تسمع الوادم
اني فاطمة و گلبي شكثر هايم
عليله ومارحم حالي الوكت ضالم
نعم اعشگ احسين وهالعشگ دايم

عليله وإنحسب ويه الـ يحبون
وصيحن ياهلا بجيت هالضعون

****

يا قرآن عمري واحله ترتيله
هوه حسين فدوه عمري يغديله
للضايع گمر لو جن عليه ليله
متعوده بغيابه دموع اصلَّيله

صلاة النوح واجب كون تدرون
وصيحن ياهلا بجيت هالضعون

**

تخنگني الحياة واركض اشتمك
عمري شگد حلو لو ينگضي يمك
يمته تعود إليه ولهج إبأسمك
اسولف بيك وأخذ عزمي من عزمك

باء البسملة انته للي يقرون
وصيحن ياهلا بجيت هالضعون

****

تعال أمن السفر ماخِلّصِت السفره
وحگ عينك احن يابويه للعشره
تحرگ ذكرياتك بيه جن جمره
تموت الغيمه گطره من بعد گطره

عيشة بدونك انته تخلص شلون
وصيحن ياهلا بجيت هالضعون

****

عاشرت الدمع والنوح والعبره
صفناتي كبيره وروحي منكسره
من دونك اضيع وداعت الزهره
بطور احزاني يوميه عليك اقره

عمري عالدمع والنوح مرهون
وصيحن ياهلا بجيت هالضعون

****
علي محسن الفرطوسي

اني ام البنين اربع ولد ربيت
خدم كلهم لبو اليمه نذر نذريت

*

حگ ارباي اريده امن الولد يوفون
خدم لحسين مو اخوان اله يصيرون
امامي وسيدي معلمتهم يكولون
ولزينب رگبهم بالشدد ينطون

تربايت علي وبيهم عزم شديت

*

اميرتهم عقيلة هاشم الحره
واني امهم همت بمحبت الزهره
حيادر اربعه بولادي مفتخره
حسين شيطلب احنه بخدمته وأمره

اتمنه ييمه حسين الك وفيت

*

راحو بالضعن جنهم كواكب نور
كفيل اخته الكمر وعله الخدر ناطور
دخيل امروته والغيره بيه اتفور
دگ صدره إلي وخبرني ننطي نحور

مامون الضعن حين الطلع صديت

*

خبر عنهم وصلني وبيه رفعت الراس
ماخيب ضنوني وكفو من عباس
كمر هاشم ابو الغيره وابو النوماس
عن قمة وفائه ناس تروي لناس

عفيه ابني الشهم وكفت اخو وكفيت

*

الصگر طبعه يجيب الصيده من بعيد
ومن طبع الحرب اشجع رجال تريد
وعباس الكمر طشر جيوش ايزيد
زلم تسحگ زلم خلاها ابني الحيد

ذليت العساكر والنهر ملكيت

*
نعاوي الفاكده ليله اون وانعه
عاشرت الونين وبالجفن دمعه
مو بل اربعه بحسين منفجعه
مذبوح وغريب وكل هله صرعه

اتمنه بدمعتي لكربله اتعنيت
*
فدوه إعمارنه منذوره الك يحسين
خدم مابين اديك وانته نور العين
بمصابك ياحبيبي نبقه مفجوعين
نذر من الصغر لحسين منذورين

حگي اجزع عليك واحگي لو ونيت

*
علي محسن الفرطوسي
القصيده لم البنين عليها السلام

ريض يحاديهم
خليني اوصيهم
....
هنا يهل ماشي بضعنهم ليه اوگف ساعه
حين سگت النوگ عني گلبي شب بوجاعه
غورگت عيني بدمعتي اعله أمام الطاعه
تدري عندي حسين غالي موسهل اوداعه
گلبي حن اعليهم
ريض يحاديهم
....
روحي مثل الجام يبني نكسرت بغيبتكم
مارضيتو امشي بضعنكم موسهل ضلتكم
الاربعه نزلولي ساعه وهاكم اوصيتكم
لزينب تضحون بالدم لو ترف رايتكم

بهل الكلمة احاجيهم
ريض يحاديهم
.....
ياعجيد الكوم تدري موسهل توديعك
انته بس أمر علينه وحنه كلنه نطيعك
لوتگول امشي بضعنكم جاخدمت ارضيعك
والله اشريك بحياتي لوزماني يبيعك

بروحي اني اشريهم
ريض يحاديهم
...
بين حيطان اربعه يمه شو عفتوني
فيض الباب بغيابك تدري دمع عيوني
ميته ولاروح بيه يل نشدت شلوني
من كثر دمعي عليكم خوفي لاتعموني

دمعتي بطاريهم
ريض يحاديهم
...
يابوفاضل بيك يمه دوم اشيلن راسي
عايش بوجداني انته يل ترست حساسي
مالي غيرك يخو زينب غيره يانوماسي
تارس عيوني وحياتي ويانفس بنفاسي

نرفع راسي بيهم
ريض يحاديهم
...
علي محسن الفرطوسي
القصيده لم البنين عليها السلام

احنه الانصار يزينب احنه الانصار

.....

الحرب نشريها نطب اعليها الزلم نگضيها
وتشاهد عينج
وعلي نبجيها اذا انلاكيها نگطع ايديها
اكبال حسينج

احنه تربايت علي وحروبنه يعرفونها
سيوفنه تقبض ارواح اويه الزعل يدرونها

فنه خيال تگرب احنه الانصار

...

نضحي بدمنه الشدد تعرفنه صدك واحدنه
تعنه بلهفه
ابشري بزودنه نخط حدودنه امن اجل معشوگنه
ونموت بطفه

سيوفنه بوكت الحرب تمطر زعل يالحره
تمتلي روس وجثث وكت الحرابه الصحره

نسوي بالحومه ملعب احنه الانصار

......

نشيل الرايه وندك الثايه زلم وفايه
العرب تعرفنه
امان اخيامج وحك ايامج نضل خدامج
نوفي بدمنه

بينه ابشري بت علي محد يمس حسينج
اله كل احنه نموت وخل تشاهد عينج

الحميه بينه تلهب احنه الانصار

.......

وعد انطينه بوفه تعنينه حلاة البينه
شباب وشيبه
حبيب القائد تعنه يواعد علينه الشاهد
ملاعب نيبه

ياحبيب الحب يجيبك والوفه لمولاتك
كلبك ابيض الله شاهد البخت بشيباتك


بالحرب يومه اصعب احنه الانصار

.....

اهالي الغيره العشق تفسيره الوفه موغيره
وتصيح اصواتنه
تضل محبوبنه وأمير قلوبنه ويامعشوقنه
وترف راياتنه

كل نبض يلهج محبتك ماكو غيرك غالي
نموت ونعيش بطريقك هالعهد للتالي

نخلي الحومه تلهب احنه الانصار

...
علي محسن الفرطوسي

وفاي صحت ياوفاي
للماي معتني للماي
ياأبوفاضل ياابو الغيره..

....

كلشي بيه غيره .. تفسيره .. كمر عدناني
ينگط امروه .. وللخوه .. بخت صيواني
شد العمامه .. گدامه .. بجت عدواني
بالحرب شفته .. واعرفته .. حيدر ثاني

يمناي ياعزم يمناي
للماي معتني للماي
ياأبوفاضل ياابو الغيره..

....

علي يشوفونه .. يسمونه .. مفحط الحومه
ضهضب اعليها .. مخليها .. زلم مصدومه
لازم المعبر .. من يگدر .. ايفسر يومه
بيده بتاره .. ابو الشاره .. دخيل ارسومه

اعداي رجفاها اعداي
للماي معتني للماي
ياأبوفاضل ياابو الغيره..

....

الموت المحتم .. اتقدم .. وهز الرايه
يكتل بكيفه .. وبسيفه .. صفت دمايه
مواعد سكينه .. وتدرينه .. گد احجايه
للنهر گاصد .. متواعد .. ايرجف مايه

رجواي ياكمر رجواي
للماي معتني للماي
ياأبوفاضل ياابو الغيره..

....

امه بدويه .. وعلويه .. تره مربيته
زينب اتعرفه .. وتوصفه .. حلو بحنيته
لوزعل صابه .. وبطلابه .. نفض خاجيته
الدنيا يگلبها .. ويطبها .. حرايب صيته
عناي للحرب عناي
للماي معتني للماي
ياأبوفاضل ياابو الغيره..

....

تجدح عيونه .. وبمتونه .. جربته يشيلها
لوصعد مهره .. وبحسره .. يخردل خيلها
الزلم تحت امره .. وبالطبره .. صدك ياويلها
كربله بجفه .. وبلهفه .. يريد ايشيلها

شراي للحرب شراي
للماي معتني للماي
ياأبوفاضل ياابو الغيره..

....
علي محسن الفرطوسي

طلع من الخيم يرف بيده العلم
هلا براعي الشهامه بدر ليلة تمامه
.....
تشكي امن الضمه الاطفال وتناديله اسقينه
وصوت أمن الخيم يسمع عباس الگمر وينه
تعنتله بگلب ملهوف تشكي لعمها اسكينه
بالجود اعتنه عباس وحمره امن الزعل عينه

ابوفاضل زعل على العسكر حمل
انه الكافل كلامه بدر ليلة تمامه

.....

يحلاله الزعل عباس ومربيته بدويه
عربي وابن عربي أوحيد هذا الاخته علويه
نحني الروس إله تقدير لو ينجاب طاريه
وكت الحرب كلش حار خله الحومه مجويه

حلو بجف اللوه كسر خشم الهوه
كصدهم ببتسامه بدر ليلة تمامه

.....

شگ صدر النهر والجيش طب للعلگمي بجوده
كامت خيل تردم خيل شمرة عوده بزنوده
سل سيفه الكمر عباس ذل الشمر وجنوده
هوس بالحرب ويصيح . فنه اليدنه لحدوده

ابن شيخ العرب ابو الغيره غضب
الحرب رادت علامه بدر ليلة تمامه

...

نازل بالحرب زلزال شد اعماته الخضره
جندل اكبر الشجعان بيوم الهاجت الغبره
خيال وأبن خيال صارت كربلاء حمره
گدها وزامط العباس ووجوه الزلم صفره

يسبع الگنطره الزلم متحيره
حلو بجفه حسامه بدر ليلة تمامه

.....

زينب بالخيم وشوف اخوها اعله الزلم خيم
صكر واعله الفريسه يحوم وتنزف كربله بالدم
يل جنك علي الكرار خصمك حگه يتندم
مارد سالم امن السيف كلمن جاك وتقدم

يصنديد الحرب دمع خصمك يصب
ولد حيدر نشامه بدر ليلة تمامه

...
علي محسن الفرطوسي

ياهيبة ريشاته والتشهد صولاته
زلزال وهز الكون يالترهب نضراته

*

غيرة علي براسه اكبر خشم داسه
عباس ابو الغيره
من الخيم قادم وتصدله الوادم
جيش وصفه بحيره
مثل الجبل واكف لون الحرب خاطف
والملعب يديره
موت احمر بسيفه منهم اخذ حيفه
الكمر موغيره

واعله الحرب عازم منه الكلب هايم
يدخل وتشوف عيون يالترهرب نضراته

*

من هاجت الغبره وسوح الحرب خطره
طباها ابو فاضل
هذا امه بدويه وكافله علويه
وللمعركه نازل
للعلكمي اتعنه جوده امتله منه
لجرف النهر واصل
تنتضره سكينه عمي الكمر وينه
دمع النضر هامل

عين اتصد عالرايه والعلكمي ومايه
جوده انترس بالماي يالترهرب نضراته

*

راكب على المهره وبكلبه الف جمره
نار الضمه بجبده
رف اللوه بجفه راعيها ابو الكلفه
يوم الحرب عيده
يشبه علي عوده حيل الله بزنوده
وياخذ الي يريده
ماثنه بالضربه يازلمه اليگربه
يفرسها الصيده

خله الجيش بحيره ديره اتكلم ديره
تتناقلها الأجيال يالترهب نضراته

*

يحصد حصد بيهم وبسيفه يكضيهم
تمطر زعل عينه
ماتنطفي ناره وبجفه بتاره
ناده الشمر وينه
اشباه الزلم رجفت مثل الغنم شردت
تشهد ميادينه
فارس سحك فارس الطف جثث تارس
اوسيفه بجفينه

عباس وصولاته والجيش بحسراته
يگطف رگب بالماي يالترهب نضراته

*
صب عالنهر دمه ناداه ابو اليمه
خويه نكسر ضهري
فگد الأبو حيره لمثلك يبو الغيره
دمع النضر يجري
ياخويه حاجيني لا لا تخليني
بعدك نفذ صبري
عمري نتهه بدونك ياخويه وعيونك
يمك خلص عمري

اكعد يابو الرايه عوف المسنايه
ضهري نكسر عباس يالترهب نضراتك

*
للخيمه ارد وحدي حاير وحگ جدي
زينب شحاجيها
منتضره بالخيمه اختك يبو الشيمه
امن بعيد اصد ليها
وسكينه منتضره بالدمعه والحسره
عالوعد تسكيها
عبدالله شيصبره بيه العطش جمره
ورمله او بواجيها

طايح كمر هاشم ضل عالنهر نايم
تعذر مارد وياي يالترهب نضراته

*
علي محسن الفرطوسي

گلب من حگه يهيم ... شمس ماضمها الغيم
ينعمه اتمنه اديم... يالولد

**
طلع من المُخيم ... صگر وبجنحه خيم
مثل بدر التمام بنوره شاغلني وجماله
مثل هيبة عمامه ... عليه لايگ لِثامه
نزل ابن الحسن من الحسن ماخذ جلاله
ارتجز هل من مُقاتل ... هله بحلو الشمايل
جمال وهيبه شايل ... يالولد

**
دعيت الله اليحرسك ... ييمه محضره عرسك
شمع يضوي وتروح المن بعد هاي الصواني
حلم عمري ازفك ... أحط حنه أعلى جفك
عشت كل العمر زفه وفرح واجمل اماني

تبخر تالي حلمي ... ردت تبقه انته يمي
سمه وحاضنته نجمي... يالولد
**
اخذ كلبي ودليلي ... گمر ويضوي ليلي
مثل ماي وجرف عشرتنه يايمه الطويله
مثل عين ورمشها ... حمامه وتهوه عشها
مثل ماي ويسير عالشجر هيج اني اجيله

كلب عاش اعله نبضه ... مثل اسمي احفضه
اعيشك لحضه لحضه ... يالولد
**
يروح بهل السهوله ... عمر درته اعله طوله
نفس ومعاشر الريه اموت اني بدونه
الربه وسهر الليالي ... اريدنه يغالي
تعال ولاتروح ادري العطش ذبل عِيونه
جمالك أيه ليه ... شلت بخت الزجيه
شلت غيره وحميه .... يالولد

**
بُرز يوسف زمانه ... مِلَه الدنيه ابأمانه
العساكر گِطعت ايديها لمن اعتناها
سحرهم من جماله ... بدر ليلة كماله
رغم ذالك شجاع ونكس الكوم ولواها

تعج خله التراب ... مطر غيض ومصايب
هله ابزر الغوالب ... يالولد
**
علي محسن الفرطوسي

......

ليلة القاسم ابن الحسن

شمعة ضواي ماتت يماي
ابني انذبح
..
اجمل ايام بحياتي وكل غلاتي اويه الولد
كلمه اليمه حنينه تعلقينه امن المهد
ضنوتي جاسم لگيته كبريته بهل الوعد
اخدم حسينك ييمه يبقه اسمه مثل الشهد

حسين الأمير وبكل ضمير
حبه اتضح
..
تحجي الناس بجماله عن دلاله اية جمال
مبخر بهيبة عمامه ياغرامه بدر الكمال
امن الحسد وين اضمه ربي سلمه امن الزوال
ويه دمي حبه صاير والنواضر اروع مثال

يمطر حنان حب وامان
كلبي نشرح
...

كبريته اعله المحنه حروفه جنه ونبص الدليل
تعبي او سهر الليالي ها يغالي وليلي ليل
منين اجتني الغاضريه بيا رزيه المدمع يسيل
وردة احلامي شفتها ساحكتها ياويلي خيل

شفتك رميه بالغاضريه
وگلبي انجرح

...
انتچيت اعله المواجع والمدامع يبني تجري
ماعفت طور النواعي بنفجاعي يگضي عمري
افگدت اغله الغوالي هذا حالي وينه صبري
يمه مذبوح بشبابك وبخضابك حنيته شعري

بعمر الشباب اوليدي غاب
وراسه برمح
...
وانه عالناكه اذكرك موتي هجرك يبني اريدك
ماألي والي وغريبه يامصيبه نحز وريدك
باليسر يمه خذوني كيدوني مدلي ايدك
شاهد احبال البديه امك سبيه لودهري يعيدك

سفرة عذاب نوح ومصاب
ماطر صبح
...
علي محسن الفرطوسي