ستشهاد مسلم ابن عقيل
للشاعر علي محسن الفرطوسي
..
حي الله مسلم نازل اعليها
امقرر الكوفه بسيفه يفنيها
...
حيل الله نازل كله بزنوده
فنه الگرب واليدنه لحدوده
للدين وأهل الدين مجهوده
صارت عليهم ساعة السوده

القاده يطلبها بساميها
حي الله مسلم نازل اعليها
....
شد اللثام ودگ على صدره
من نسل هاشم ياهو الي يگدره
حي الله ابوطاهر لكد مهره
بذياله يعثر صار الي يخزره

ضحكها خوف ورد يبجيها
حي الله مسلم نازل اعليها
...
غيض المراجل شرعب براسه
جن علي طب وياه عباسه
يازلمه يِلّحَگْ يِجِر انفاسه
بأس الغوالب كله إباسه

نجوم الضهر عازم يراويها
حي الله مسلم نازل اعليها
....
بكل دار تلگه الصرخه مسموعه
صارت الكوفه كلها مفجوعه
مسلم وحيد أوگوم مجموعه
محد يسنده أوياه بس طوعه

حب الفواطم منزرع بيها
حي الله مسلم نازل اعليها
...
لوماغدرهم ياهو إلي يلوحه
جاخله كل الزلم مذبوحه
ياجبل عالي وخطره سفوحه
سيفك ضربته هوايه مملوحه

لوماغدر يگضي اعله تاليها
حي الله مسلم نازل اعليها

.......
زلزل قصرهم صوت ياحيدر
خزراته يعني هذه اموت احمر
وعالموت گلي يابشر يگدر
القصر كله بمسلم ا تحير

نار البصدره أعدائه يجويها
حي الله مسلم نازل اعليها
.....

علي محسن الفرطوسي

رابط القناة https://t.me/AliAlFartusi

قصيده للامام الباقر عليه السلام
.......
اى ياجرح الايام
كوفه وغاضريه
هوه الفاكد عزاز
كل عمره منيه
......

عمري خلصته جرح نزاف يجري
ونار المخيم لهبها بصدري يسري
ضاع بين الحسبه ول اهات عمري
من شفت زينب تحشم ضاع خدري

من رحت يعباس
هجمو لخيمنه
ساعه عيني لحسين
ساعه لرقيه
...

شايل حساسي عبي وضربات المتون
ودمعتي ترسم خيم مابين الجفون
منسحن صدري على الي صدره مسحون
مرمي جسمه وبحوافرهم يسحكون

عاري ضل لحسين
ماواحد ينصره
وعله صدره اتدوس
خيول اعوجيه

.....


انه الباقر عشت ايام الاطفوف
شفت جسم حسين كعبه لكل لسيوف
وبوفاضل عالنهر مكطوع الجفوف
كل سيوف اهل الغدر في جسمه تطوف

كل سيوف الاعداء
صلت اعله جرحه
بعينه نضرت عتاب
حانت المنيه

...


جبدي مسموم وبقه فكري اعله زينب
من بعد موتتي ماواحد تسلب
لجن زينب من وكع عباس تنحب
حالت حسين وعياله حاله تصعب

اني يمي احباب
ويشيلونه جسمي
لاكن جدي حسين
ضل جثه رميه

...

من اموت احباب عندي وعندي انصار
جسمي سالم ماعليه من حافر اثار
ولا على داري خصومي بنار تندار
مثل يومك مايمر يحسين لاصار

يومك انته يحسين
مامر عالبريه
زينب فوك لجمال
كادوها سبيه
...
 للشاعر علي محسن الفرطوسي
رابط القناة https://t.me/AliAlFartusi

عباس الكوفه يسمونه
واحد بس جيش يشوفونه
مسلم وتنخت بيه طوعه
خله الكوفه تون مفجوعه

*******

دكت طبول الحرب وصطفة خيول وزلم 
عاليمين وعالشمال بعينك تشوف الخصم
 ياهله بفتيان طالب لوتطب ماتنهزم
مسلم وياهله بمسلم ونعم من هالاسم

حته الريح توقف حاير
سيفه يلوح الحط و الطاير
ياجندي اليوكف بعيونه
عباس الكوفه يسمونه

*******

مسلم ومسلم اطباعه بالحرب مثل الكمر
زلزله ونازل عليهم مايهمه كل خطر
راوه عدوانه بحسامه بالحرب موت الحمر
زوده من زود ابوفاضل سوه جاري الدم نهر

اقراء انا اعطيناكَ
غيرةُ عباسٌ بدماكَ
عدوانه شلون يلاكونه
عباس الكوفه يسمونه

*******

ياغضب نازل عليهم يحصد بسيفه الركاب
جن علي وبضهره الاشتر يومه جن يوم الحساب
اترف امن الورده طبعه وبالحرب طبعه العذاب
المايعرفك مايثمنك ونته طبعك ماتهاب

جن حيدر وبضهره الاشتر
مسلم خله الجيش تحير
والضربه بجفك مضمونه
عباس الكوفه يسمونه

*******

يرتجز بالحومه مسلم ياالله طوعه هلهلي
اليوم اراويهم فنوني اليوم اذكرها بعلي
من كمر عدنان زودي الغبره بسما تنجلي
مجندل الفرسان كلها وهذه زودي الاولي

اتبختر هاليوم بزودي
فنه اليكرب يم حدودي
كل العدوان يهابونه
عباس الكوفه يسمونه

*******

اجهدك ثقل الحديد وجبدتك مثل الجمر
مايكدرونك يمسلم اوياك لجئوا للغدر
رايتك رايت محمد ابد لا ماتندثر
تبقه بليالي الكوفه المضلمه مثل البدر

يارايه ترفرف منشوره
نور العليه يلامس نوره
ماكدروا نوره يطفونه
عباس الكوفه يسمونه

*******

علي محسن الفرطوسي

قصيده لشهر محرم الحرام

:ليتَ شعري: وليتَ دمعي بهل المجالس
أقره وابجي يابو صالح وأنته جالس
انته وين بيامكان. للحزن إذن اذان

******

ابتده شهر المحرم وانته غايب
رفرفت رايات سود اعله المواكب
بده الناعي ينعه لشهر المصايب
وانته دمعك من دمه يهل للحبايب

مدمعك يامهدي يبلّل ثيابك
هل شهر عاشور بس انته بغيابك
ياامام لهل الزمان . للحزن إذن اذان

******

كل حياتك كربلاء صبح ومسيه
انته وين الليله حاضر ياعزيه
رد محرم وانته مارديت اليه
يعينك الله بعينك تشوف الرزيه

تنضر عيونك يمهدي إلي جره وصار
حافر يدوس بصدر واخيم تشب نار
وبالخيم ضاع الأمان. للحزن إذن اذان

******

ليتَ شعري يابو صالح انته وينك
هل محرم ابتده موسم ونينك
مو دمع من دم تهل يالمهدي عينك
تشوف عماتك سبايه الله اليعينك

تباوع لزينب شمر شمسوي بيهه
مبين هواي الحبل جارح اديهه
مضيعه جفوف الحنان. للحزن إذن اذان

******

يافشلتي گبالك أمن انسه المصيبه
بيوم عاشر حالتك تصبح عجيبه
دمعك الأحمر نزف لجل الغريبه
ولجل الحسين ولجل جثته السليبه

انته تحضر ويه جوگات العزيه
ونار البصدرك عله زينب سريه
ضرب سوط وخيزران. للحزن إذن اذان

******
ادري مهر حسين من صاح الضليمه
عينك اتصد زينب ومن دون خيمه
بلايه والي والضرب اذه اليتيمه
الليل بين والعدو ماعده شيمه

انته صاحب العزاء يامهدي انته
المواكب طلعت تواسي وفگدته
بكربلاء لوجمكران. للحزن إذن اذان
******

علي محسن الفرطوسي

قصيدة لمحرم الحرام ١٤٤٢
ليلة ابوالفضل العباس عليه السلام
....

هذه عباس الكمر. الجيش ناده والنهر
ياعباس دخيلك       ياعباس
...
خطر وتوسط الگوم  نوه اليوم  الحرب
ياهلا بـسيد الماء   اعله الاعداء   رعب
تحير الجيش يمغوار ومثل نار   الكلب
بسيفه سجيل الآجال بغضب گال  اطب

لزم بيده مطهمه     يدنه ليه ياأزلمه
ياعباس دخيلك        ياعباس
...
تحزم ابشيلة اخته  اعله بخته  ونوه
الاموت الاحمر تقدم  وتبسم الهوه
شايل الجود يكفال وبالشمال اللوه
فر (رحه )الموت فقط صوت ازلزل نينوه

حمم بركان الاجل   بيها ابوفاضل نزل
ياعباس دخيلك         ياعباس
...
طحن يطحنها عباس يهب ريح الأجل
ادخيله عازم على الگوم ابو الغيره ارتجل
يرعد ويمطر أخطار ابوفاضل زعل
جن علي قالع الباب بالطفوف حمل

غيره رفت رأيته دخيله بخته وغيرته
ياعباس دخيلك. ياعباس
....
عسكر الگوم تحير وصل ليهم خطر
بجربته اليوم يحط روس مع ماي النهر
هندس الطف ضلامه ونزل ليها كمر
كلشي بالطف ركعله أمير اعله البشر

ياهله بغيرة علي ناده يختي ادللي
ياعباس دخيلك ياعباس
....
إلي شافك ياعباس علي يشوفه واجه
التلوحه تذبحه ورعب مات النجه
حيدره الي بيمينه ومحمد منهجه
الحومه صارت جثث ويه روس اماججه

سوه بالطف ملحمه شبع سيفه أمن الدمه
ياعباس دخيلك. ياعباس
..
مِلَك شاطي الفرات وترسها جربته
عينه اعله المخيم أو ترفرف رايته
ماشرب ماي رغم نار تشب بجبدته
بيه حميه وتذكر اخوه وعطشته

للوفه رأس الهرم. يدري اخوه جبده نثلم
يا عباس دخيلك ياعباس
..
علي محسن الفرطوسي

ليلة ام البنين محرم الحرام
...


اكتب رسالات السفر
ماردلي من عدهم خبر
عذبوني. إلي جفوني
ومااجوني. وانتضر

**********

من كلب ام البنين لحضرت الغالي كتابي
ابتدي بشوگي وسلامي ودمعة عيوني الترابي
اكتبت اول رساله حسين وينك فوك بابي
يوسفي راح وتركني يعقوب ماو اصل مصابي

يعقوب گالوا قصته
بسبعين ثكلى مصيبته
إني اكلف. دمعي ماجف
كلبي بالطف. وانتضر
**********
يالخذت روحي وعفتني والعمر بعدك عذاب
ألزم الطير وأخبره ودلي مكتوب وعتاب
من رواحك يبو اليمه شاب راسي وكلبي شاب
اعتذر عن كل قصوري شوايه الأربع شباب

كون عشره أمن الولد
المهم سالم ترد
بالحرايب. والنوايب
هالاطايب. وانتضر
**********
الفاكد احبابه حياته تصير حسرات وألم
اختنگ وانفاسي تشتم يمّه عطاب الخيم
افز مرعوبه وادورك واحس مصيوب بسهم
جبل شفتك يبو اليمه وعالنهر نصه نثلم

منكسر هذه الجبل
خوفي عباسك رحل
حسين حاير. والحراير
كلبه كاسر. وانتضر
**********
لن ابن حذلم اسمعه وصوته بي نبرت فجعيه
بلهفتي اركض گصدته وياخبر رايد يذيعه
لنه خبرني ابنيني والكمر ضل عالشريعه
فدوه كتله اربعتهم المهم حسين ورضيعه....

حسين گلي بصحته؟
شلونه هوه وعيلته
من دمعته. افتهمته
مودع اخته وانتضر
**********
ترست الدنيه دمعتي والطفل طاح أمن اديه
گلت مكتول ابوفاضل يعني زينبهم سبيه
بت علي بلايه كفاله وحسين ماخذته المنيه
يابشر سولفلي أكثر اسوت جيوش ال أميه

بياوضع صار الخدر
شسوه بزينب شمر
الخدر غالي. وعالغوالي.
كل سؤالي. وانتضر
**********
من جبت طاري المخيم يعني هاي آخر رسالة
زينب اعله التل تنادي وينه راعيها الكفاله
تركض وتعثر اختهم والشمر حِضر احباله....
بناكه هزله يركبوها حسين سلبو كل عِياله

بضهر عاشر بت علي
من جيش أميه تنولي
وبيسرها. ابلا كمرها.
ياصبر ها. وانتضر
**********
علي محسن الفرطوسي

قصيده لام البنين
...

هايه ام الاربعه باب ربنه الواسعه
للوفه انتي وللعطاء ماتخيبين الدعه
...
معجزه أمن المعجزات خصج الله بمكرمات
بيج تگضي الحاجه
فاطمة ام البنين نور رب العالمين
بابه ومنهاجه
مايخيب الي عتناج وبأسم فاطم دعاج
وإلي بسمج ناجه
تنحل الصعبه وتهون خيرج تشوفه العيون
بالكرم سباجه

تلقبت ام البنين بيهه هيبه أمن الحسين
انتي للحب والوفاء ماتخيبين الدعه
....
اوكفاج أمن الفخر علي ايخطبج حضر
وصرتي ام عباسه
بيوت بيها الرب إذن الدينه يصيرن وطن
بخته ونوماسه
منزل يزوره الوحي وجم ملك يحضر علي
يقدس ابنفاسه
يلي حبيتي الحسين إله نذريتي البنين
وتلثمي من راسه

يل حنانج معجزه بالوفاء مطرزه
الج تشهد كربلاء. ماتخيبين الدعه
...
يلي ربيتي الولد اربعه وكلهم مجد
ساعد يشد ساعد
ابوفاضل لوزعل عالخصم يمطر إجل
يدنه ليه ياواحد
من يغير بمهرته الجيش تسمع صرخته
قائد ايطگ قائد
غيره عدهم من علي الصعبه بيهم تنجلي
زود دمهم زايد

الگمر رافع راسج. عاش ويه حساسج
لخته ضحه بالدماء ماتخيبين الدعه
...
بصمه الج ابكربلاء عالنهر نزفت دماء
تضحياتج هايه
بالضعن روحج مشت بالمدينه مابقت
ترفرف اويه الرايه
الفاتحة تقرين إله حسين محفوض وهله
وبسمله وقرايه
خيمة حبج للضعن للهوادج من مشن
اقريتي اشجم ايه

للسفر حين النوه ودعيتي القلهوه
عينج تحامي النساء ماتخيبين الدعه
....
خيمة الحب والوفه غيمه تمطر عاطفه
يالحنانج اية
الكمر يمطر أجل الله يستر لوزعل
وبيده اترف رايه
للخدر ضحه بدمه وجبدته تسعر ضمه
النهر ذله ومايه
ولدج الكلهم ابه مانسو حگ الربه
وهاي موش حجايه

گلبو الطف ونعم. زلم تسحگ عالزلم
النصر بالدم الله شاء ماتخيبين الدعه


.....
انتضارج للضعون بدمعج تفيض العيون
واگفه اعله ابوابه
لن ابن حذلم اجاج بالمصيبه خبراج
حسين ضل بخضابه
وزينب الحره تروح للسبي وكلها جروح
والخيم لهابه
حزنج اشتد والعويل زينب تشد الرحيل
بدمعه السجابه

وانتضريته الضعن من رجع لرض الوطن
خلص عمرج بالعزاء ماتخيبين الدعه
....
علي محسن الفرطوسي

قصيده العليله عليها السلام
،،،،،،،

طال الغياب يبويه طال الاغياب
بلكي عطرك اشمه وي هوه الهاب
.....
يالرحت وبروحتك گلبي كسرته
الهوه بعدك تره تخنگني شمته
الابو شمحله گعته ويه بنته
راح ابوي وگلبي تحلاله حسرته

واليفارگ غالي طبعه يزيد الـ عتاب
طال الاغياب يبويه طال الاغياب
....
عمري شمعه وذايب بنار نتضارك
غبت عني والدهر ضيع اخبارك
بويه انتضرك بعدني اباب دارك
مثل الحميمه وكسر جنحي قرارك

ماخذتني بهالسفر بويه الگلب ذاب
طال الاغياب يبويه طال الاغياب
...
وينك وجلمة تعال اشگد گلتها
بكد نجم ليلي بغيابك رددتتها
بويه چلمة رايح بگلبي اتركتها
واني ماتت روحي صدگ من وكتها

ودفنتني بحسبتي لا مو بالتراب
طال الاغياب يبويه طال الاغياب

...
الدنيه ماترحم طبعها هوايه قاسي
منها ماشفنه فقط بس المأسي
كورت هم الوكت كله أعلى راسي
طفله وبحسباتي تتكسر انفاسي

جرحي من غيبت هلي يادنيه ماطاب
طال الاغياب يبويه طال الاغياب
....
ذكريات اهلي أمن اذاكر جمره تلهب
وين عباس الكمر جاوين زينب
طفله اني والطفل وي أهل يلعب
راحو اخواني وخواتي وراسي شيب

هذه حالي وحگه لومنه الطفل شاب
طال الاغياب يبويه طال الاغياب
...
علي محسن الفرطوسي

نعمه مجلسك يامحله هالنعمه
ماتسوه الحياة ابلا بچي وخدمه
كون اطبع جفوفي بصدري بالطمه
وأكسر عضمي للي منكسر عضمه

               (   نعي للعليله   )
 
يبويه من رحت ماعندك احساب
تضل بتكم تناطركم عله الباب
عليله والمرض يابويه ماطاب
تنام شلون الي تفكد احباب

هلي راحوا وخلوني وحيده
يبس عودي صرت مثل الجريده
يبويه البيت موحش مااريده
عليكم ياهلي اسكن البيده

بعدني بعازتك يابويه شبساع
حَضرت الضعن وتريد الوداع
صوتك كل وكت يترسلي الاسماع
يكلي كل هلج اجثث على الكاع

البت ابلا ابو تعيش الهضيمه
وانه وحيده وشوف البيت هيمه
وعرفت ال مثل يابويه ونديمه
اثاريه الابو من صدك خيمه

...........

 مابي حيل بيدي اومي . ولاباي
اصيحن ياهلي قوه  . ولاباي
لاعباس ضل يمي . ولاباي
راحو فرد روحه شلون بيه
.....
بيتي الفرغ ماطبه وسكنه
بعد مابيه عبدالله وسكنه
اداوي ياجرح يهلي وسكنه
عليله والغياب اثر عليه
....
 علي محسن الفرطوسي

تقدم موت الاحمر
علي يسمونه الاكبر
دخيلك ياعلي.. دخيلك ياعلي
......
علي انفاسه. جمر بركان من غيض المراجل
أو بحساسه. يشيل حسين والغيره ابوفاضل
رفع راسه. وناده بالحرب (هل من مُنازل)
العدو داسه. علي والساتر الله اليوم زاعل

جبل والجيش صخره
حطب وعيونه جمره
دخيلك ياعلي. دخيلك ياعلي
.......
لكد مهره. ابابيل الغضب والسيف سجيل
يدگ صدره. وعثرت بالحرب الخيل بالخيل
نضر نضره. وتشوف الزلم بايد منها الحيل
مثل جمره. جبده والعساكر صاحت الويل

سحل أكبر قيادي
انه الأكبر ينادي
دخيلك ياعلي.. دخيلك ياعلي
....

الحرب عيده. شباب ونازل بكيفه ايتبختر
رفع ايده. جبل فوگ المهر شافوه الاكبر
اخذ صيده. صگر وعلى الطريده بهيبه يفتر
على البيده. نزل واحد لچن بحساب عسكر

نجم ومطشر بليل
تشوف الزلم والخيل
دخيلك ياعلي... دخيلك ياعلي
...

كتب يومه. الأكبر يومه جن يوم الصميده
على رسومه. تعب وعيونه تختار اليصيده
بثرى الحومه. تعنه ومرغ خشوم العنيده
علي دومه . إذا طب معركة أختار اليريده

ملك والكل عبيده
العساكر كلها بيده
دخيلك ياعلي... دخيلك ياعلي
...
لبو اليمه. رجع والغانمه رأس ابن غانم
يبشر أمه. يگلها ابنج ترس الطف جماجم
اشتكه همه. جبدي أمن العطش ماضنه سالم
الهوى اشتمه. جمر بركان يحرگها العوالم

ابد ماتطفه ناري
الحرب عيدي وقراري
دخيلك ياعلي... دخيلك ياعلي
......
علي محسن الفرطوسي

اخوتي صار تغيير في هذي القصيده وتعديل ف الي أخذ القديمه خلي يحذفها ويجدد هذي 🌹

اني وشِمعِتَك ذبنه بغيبتك
يبني وفرحتك موطنها الجزع
ذبلت زهرة سنينك طالع تفدي حسينك
...
يل جنك بياض الشيب البراسي
ياأول عشگ بيه عايش حساسي
طالع للحبيب اتضحي وتواسي
بيمن يبني بعدك اترس انفاسي

ياأبن الحسن يالحضنك وطن
يوليدي الزمن خلاني انفجع
ذبلت زهرة سنينك طالع تفدي حسينك
....
لابس لامتك جنك بدر ليلي
ياأول جمال البيه أشد حيلي
شنهي اليوجعك يالغالي احجيلي
متحني الولد بدمومه ياويلي

بِخضابِك تِروح متغطي بجروح
واني إعليك انوح واحمل ياوَجِع
ذبلت زهرة سنينك طالع تفدي حسينك
...
ياأية ترافه وحزنك الامك
عطرك يبني بعده تارس خيامك
قربان العشگ من أنطبر هامك
كل قطرة دمه ترسم خطه اجدامك

احلى أمن العسل اتشوف الأجل
والخير العمل عاشگ من طلع
ذبلت زهرة سنينك طالع تفدي حسينك
...
ميت ولحبيبك تنفتح عينك
مغرم يالولد وتضحي لحسينك
بدماك الزكيه ناصرت دينك
وحال الموت يبني وبينك

ماأحمل هجر بعدك انكسر
ياريع العمر ونتك تنسمع
ذبلت زهرة سنينك طالع تفدي حسينك
...
جابك للخيم محبوبك بدمك
طلعت ابلا شعور اصرخ يبعد امك
يا وردة حياتي بحسرتي اشتمك
ياشبل الشجاعه ناصرت عمك

يابدر التمام يـ مشيم العمام
سيفك انتقام يبني من فزع
ذبلت زهرة سنينك طالع تفدي حسينك
....
علي محسن الفرطوسي

بين دخان المُخيم وبين الف شامت وِكف
حافي طلعت من خدرها هاي بس وحدها طف
صعبه لوتعثر تره وهيه اميره مخدره

آهً أه لمصاب زينب

انه بعيوني دمعتي تختلف عن الدمع
تسولف بحب ابوالاكبر يالتحب منها استمع
غير حب احسين والله ماٳريد واقتنع
حسين عايش وسط روحي ومندفن جوه الضلع

وصيَتُها لإبنِها العبـاس (ع) :

[بُني .. إن جَلستَ أمامَ الحُسَين (ع) فـ إجلُس جَلسةَ العَبد، ثاني الرُكبتَين ولا تقُل لهُ "أخـي" بل قُل لهُ "سيـدي ومولاي"]

⭕يُترجم الرادود الحاج باسم الكربلائـي وصية السيدة أُم البنيـن (ع) في هذا المقطع 🖤💔

ونعم يالكافل جن علي ويقاتل

....

مثل حيدر عوده. سرفن اعله زنوده.
وعتنه يلاگيهم
الحرب هاي جنوده. اجه يوفي وعوده
. بالضرب يفنيهم
ياهو يدنه حدوده. بيده شايل جوده
. ضربته يراويهم

يعني موت العاجل جن علي ويقاتل
.....

الجيش ضاع بخوفه.. رسومهم مخطوفه
والزلم محتاره
السيف باس جفوفه.. يادخيل حروفه
الحرب شبت ناره
النهر هز جروفه.. الموت صار يطوفه
واستمع لخباره

بالمراجل حافل جن علي ويقاتل

...
عسكر يشوفونه.. فنهم يگربونه
كلشي يصرخ خايف
ضربته مرهونه .. موتهم يدرونه
واكف ايطگ واكف
الطايح يتركونه.. صعبه يشلونه
زينهم ضل راجف

ابن حيدر صايل جن علي ويقاتل

...

ياعجيد الساده .. نزل ذل القاده
كسراهه خشومهم
ياهو اليتماده.. زود حيدر عاده
صوفرت اوجوهم
بصوت بيهم ناده.. علي هاي امجاده
والهواشم يومهم

الشجاع الباسل جن علي ويقاتل
...

فرك خشم العسكر .. والكمر يتبختر
ياهله بصولاته
نزل ليها الهزبر .. بالجماجم طَبّر
هزهم بحملاته
واكف اعله المعبر .. بالزلم يتخير
زلزله بطبراته

اعتناهم راجل. جن علي ويقاتل

..

رأيته معليها .. الوادم مبجيها
تصيح كلها ادخيله
بسيفي إله افنيها.. أعيونهم اعميها
حيل عوده بحيله
أطفالها مرويها.. كافل وحاميها
ماتمرهم عيله

لحده ياهو الواصل جن علي ويقاتل
....
علي محسن الفرطوسي