قصيده .. تطبير ..
لطبرة الامام علي. عليه السلام
.........................
اميري منطبر واجب عليه
اخلي ادمومي هاليله جريه
*.......................*
علينه وجب ياناس
ننزل من دمه الراس
علي يفتر بالنفاس
وجوبن مو بالحساس
علي..  علي
حيدر حيدر .. حيدر حيدر
مواستي لعلي هاي المسيه
اخلي ادمومي هاليله جريه
*.......................*
علي ياقالع الباب
بسجوده  الليله ونصاب
مواساتن لبو تراب
اخضب راسي اخضاب
علي .. علي
حيدر حيدر ... حيدر حيدر
جروحي زينبيه وحيدريه
اخلي ادمومي هاليله جريه
*.......................*
الوحي يم حيدره طاف
بجتله النون والقاف
مصحف رب الالطاف
براسه جرح نزاف
علي .. علي
حيدر حيدر ... حيدر حيدر
املاك السمه سوت عزيه
اخلي ادمومي هاليله جريه
*.......................*
موالي ولابس اكفان
عليه اثياب الاحزان
وداعك ياعلي حان
التحقة ابرب الاكوان
علي .. علي
حيدر حيدر ... حيدر حيدر
عفة ايتامك بدمعه شجيه
اخلي ادمومي هاليله جريه
*.......................*
ليالي القدر تنعاك
بسجودك فاضت ادماك
الكوثر وي يتاماك
تلت (انا اعطيناك)
علي .. علي
حيدر حيدر ... حيدر حيدر
الكوثر ناحت بصوت الزجيه
اخلي ادمومي هاليله جريه
*.......................*
علي الفرطوسي

            لتروح عنه----خلیک یمنه
            یاسلوة املنه بعد امنه
         لتروح فدوه----یلکلک امروه
           لوسافرت بویه منو النه
&&&&&&&&&&&&&&&&&&&&&&&

دخيلك ياعلي بويه .. لاترحل يضي عيني
گلبي يمتلي بالهم  .. اذى اتگلي تودعيني
كون مقرر اتودع .. ﭼـا المن تخليني
عسن راسي ولا راسك .. لعمرك فدوه اسنيني

لغيابك يحيدر .. گلبي تفطر
القدر لوبيدي راسي ولا راسك
مااگدر اعوفك .. مثل طير واطوفك
نهضمنه بغيبتك بويه نهضمنه

&&&&&&&&&&&&&&&&&&&&&&&

گلبي مبتلي بالهم .. بعد اهلي وعز ناسي
الليله يمك بدمعه  .. حسيني ويه عباسي
يبو زينب انه زينب .. جفك ما يحس راسي
اذا تتوقف انفاسك .. اتمنه توگف انفاسي

انفاسي انته .. عطرك فگته
بعطرك ريحة الموت انه اشمهه
زينب يابوزينب .. بعدك تضل تنحب
بعيد الله ونصبح في يتمنه

&&&&&&&&&&&&&&&&&&&&&&&

تون بالمصحف الليله .. يحيدر سورة التكوير
(بأي ذنبٍ) يوالينه  ... راسك ينطبر تطبير
الكوثر ناحت لفگدك  ... وبعد  هم  اية التطهير
ياقلع حصن خيبر   .. ونتك جارحه اﭼـم طير

الليله دموعي  .. وحني ضلوعي
تره الفاگد عزيز النوح طبعه
احنه ايتام حيدر .. بجينه لفگده اكثر
والدنيه ابتلت من دمعنه

&&&&&&&&&&&&&&&&&&&&&&&

عن زينب يبواليمه   .. غطي جرح ال بهامك
يأذيهه وياذينه    ... علي كل احنه ايتامك
نواسي ويه الحره ... اجينه احنه خدامك
حزمنه على الخدمه  .. علي هاليله بحزامك

خدام جينه   .... نصرخ ولينه
بحزام الخدامه الليله حزمنه
عل الباب وگفنه  ... نذرف دمعنه
مدد  يابوالحسن منك عزمنه

&&&&&&&&&&&&&&&&&&&&&&&

يبـﭼـون بدمع هامل  .. الليله الحسن وي حسين
وبوفاضل ابو الغيره .. يواسيك بدموع العين
گلبه ملتهب لجلك   .. ليله ينتهي بونين
وزينب ياحزن زينب .. تون ياآهلي الطيبين

خلصو اهلنه   ..  محد ذكرنه
راحو للمقابر  باخر اوداع
هلن يادموعي  .. يبقه هذه لوعي
يعين الله الفگد غالي امن اهلنه

&&&&&&&&&&&&&&&&&&&&&&&
علي الفرطوسي

عندما بقى الامام الحسين عليه السلام وحيداً بالميدان
كلم اخوته واصحابه ... قائلاً
........    .  .      ...........
ياإخوتي  وحدي خليتوني
ياأخوتي   والعده أيحيطوني
نوحي   لورحت من  الخيم
نوحي    ياهو يحميها الحرم
وحدي خليتوني  وحدي خليتوني
*****************
من عندي رحتو بالعجل   وضليت اني وحزني
من يمي رايح جم اخو      حته الطفل عايفني
ولوحدي شافوني العده      والشمر مايرحمني
وحدي وجيوش اشكثر       متعنيه الي تذبحني
...........
جتني زينب   أمحدبه أمن أمصابي
جتني زينب   وانه انعه احبابي
زينب خويه  رجعي لخيمتج
زينب اتوجهي لله ابلوتج
نوحي  يختي كل حيلي انهدم
وحدي خليتوني  وحدي خليتوني
*****************
من راحو احبابي ومشو   حيره اني حاير بمري
خوفي امن أطب المعركه   امن الجيش يوصل خدري
بين المخيم والعدو             وكفيت محني ابضهري
أتمنيت ابوالغيره عدل       يابوالفضل لوتدري
............
يابوفاضل وين عفت حسينك
يابوفاضل   لحرم محتاجينك
وينك اتمنه لوترجع عدل
وينك حسين نكسر يابولفضل
نوحي  ارجوك ارجع ياشهم
وحدي خليتوني  وحدي خليتوني
*****************
بعيوني انضر للخيم   بس الحرم وحدها
سلبو بنات المصطفى  اعدانه محد ردها
من جينه عباس الوكف  كل الحرم صعدها
جاوينه ليهن مايجي  خيمنه العدو فرهدها
.......
انه إدري  زينب بجيها سكته
انه إدري    والشمر تهضم طگته
ويلي اجم جرح اذاها
ويلي  الشمر ضرباها
نوحي  امن المتن اجم الم
وحدي خليتوني  وحدي خليتوني
*****************
باجر اذا يطلع صبح وراسي انكطع عن جسمي
زينب تصدني وتنهضم  تشوف يكطر دمي
امكلفها اني بالحرم تحرس تصير وتحمي
الجانت عزيزه امخدره   مهظومه أتمر يمي
.......
ياعزيزه بالحبل كادوهه
ياعزيزه امن الخدر طلعوها
راحت ذيج الليالي والخدر
راحت هسه يحديها الشمر
نوحي  لاكفيل لا علم
وحدي خليتوني  وحدي خليتوني
*****************
كل خوفي ارقيه تصد تشوف الشمر وشسوه
كاعد على صدري يحز ابنحري واني اتلوه
خوفي التراجي تنسلب لو بالجمر تجوه
طلعة رقيه امن الخيم مهضومه تمشي كوه
.........
يارقيه بويه شمسويلج
يارقيه  ادري امسلبينج
روحي العمتج ياسلوتي
روحي يابويه كطعو ركبتي
نوحي  واني ابقه بغربتي
وحدي خليتوني  وحدي خليتوني
*****************
للشاعر علي الفرطوسي

القصيده بعد التصحيح 👆👆👆👆

             قد زلزلت زلزالهـــــه              عباس ناده نــــــزالهه
            ناده الكمر يوم الحرب             هل الدنيه اكلبهه كلب
                                        *
                               صوت الكمر مــن اعتله
                               صارالنشور بــــكربلــــه
                              يوم الحشر    حرب الكمر
                              حيرهــه راعي العــــايله
            أتكورت اجــبالـــهه                  عباس  ناده نــــزالهه
            عباس انه ادخل رعب             هل الدنيه اكلبهه كلب
                                        *
                              سرافيل صـار بيـــمنته
                              والقابص اصبح يسرته
                              وين المفر    يهل الغدر
                              أرواح يــــترس جربته
            وين ال أميه ارجالهه                 عباس ناده نــــزالهه
            أرواح اســـلبهه سلب               هل الدنيه اكلبهه كلب
                                       *
                               هاذ اني حامي العايله
                               اليوم اسوي الزلزلـــه
                               ماأنكدر      اني الكمر
                               عباس ابن عقد الولــه
            اكطع اميه انــــــسالهه               عباس ناده نـــــزالهه
            جن وأنس هل مرتعب             هل الدنيه اكلبهه كلب
                                         *
                               خوف البحارتـــفجرت
                               كاع وســمــه اتغــيرت
                               صور النشر   بيد الكمر
                               وسياد امـــــيه ادهورت
           يوم القيامه افـــعالهه               عباس ناده نــــــزالهه
           الكل يفر ويله الگِرب              هل الدنيه اكلبهه كلب
                                        *
                              

                               صّـورالحرب كل القارعه
                               بزود انفخ عل المشرعــه
                               صوته نتشر   يرعب بشر
                               بصوته السماء متصدعـه
           قد بينت اهــــوالهه                عباس ناده نــــــــزالهه
           الماي منه ماشرب                   هل الدنيه اكلبهه كلب
                                      *
                               رعب الجبال تــــــبعثرت
                               الناس القيامه اتـــصورت
                               شنهي الخبر    كلشي ندثر
                               حته الوحوش أنحـــشرت
            كل حرمه طاح احمالهه          عباس ناده انــــــزالهه
           اليوم صدري بي غضب           هل الدنيه اكلبهه كلب
                                         *
                          لخادمكم علي الفرطوسي
                
        
           

طالت وحشة الليل  *  وصلت حدنه الخيل
مرعوبه المداليل     *  يبو فاضل دخيلك
،،،،،،،،،،،،،، ،،،،،،،،،،،،،،،،
ماعدنه احنه غيرك     يبو اجفوف السخيه
 ليل وﻻكمر بيه     موحش عالبريه
ازرك لون اﻻمتون     والسوط اعله ديه
يارب سترك انصيح     من هاي البليه

حيره ابين اﻻمرين  *  بين الكمر وحسين
 المن دمعة العين  *  يادمعي واسيلك
              يبو فاضل دخيلك
،،،،،،،،،،،،،،،، ،،،،،،،،،،،،،،،،، ،،،،،،،،،
انته ابن الوفيه     راضع من لبنها
راسك غيره  يفور    كفو منك يبنها
امواعد سكنه ابماي     وهسه احمر متنها
ورقيه تصرخ ابصوت     مجروحه اذنها

خذو منها التراجي *  يبو حلو المحاجي
 شتفيد البواجي *   عذبنه رحيلك
             يبو فاضل دخيلك
 ،،،،،،،،،،،، ،،،،،،،،،،،،،،، ،،،،،،،،،،،

يكلها ابعالم الروح     كمت وبلا جفوفي
وسمع بالشمر صاح     اخوتج ذوله شوفي
كل همي عباتج     يزينب هذه خوفي
اجيت امفرع الراس    امقصر قصدي اوفي

من يم النهر ليج  *  قصدي خويه احاميج
سوط الشمر ياذيج  * ابغيض اصرخ يويلك
،،،،،،،،،،،،،،،،،،،،،،،،،،،،،،،
بين الخيمه والماي     نشرت اعيوني حراس
ادري اتفر اﻻطفال     خوفي اعليهه تنداس
حي ميت احاميج     يزينب انه عباس
وحكج ما اعوفج     حته ابكطع اﻻنفاس

ﻻجن لو حضرتج  *  بلاجف بيش انفعج
غالي والله خدرج  *  يجسمي وينه حيلك
            يبو فاضل دخيلك
،،،،،،،،،،،،،،،،،،،،،،
انه الطفيت عيني     حته ما انضرج
غيور وتصعب اهواي     شمر زينب يصطرج
تالم كلبي والله      اذا كافر يجرج
لجن عفيه يخويه      ابد مطيتي خدرج

ما اصبر واﻻطفال * مربوطه بالحبال
ونه ايلقبوني كفال * يجفي اشلون اشيلك
             يبو فاضل دخيلك
......،،،،،،،،،،،،،،،،
خيمجن صارت ارماد     وشوفنج تركضين
ساعه لصوب اﻻطفال     وساعه للنساوين
وكفتي ابطول عباس     وبهيبة ابو حسين
شگگ جفج السوط     بيهن من تشكفين

ورقيه اجفوفهه اصغار *  بيهن شفتي اﻻثار
برجليها حرك نار *  تون عمي اشتكيلك
           يبو فاضل دخيلك
،،،،،،،،،،،،،،،،،،،،،،
للشاعر علي الفرطوسي

 
ابوذيات ....
.........
من مثلك وكع عطشان ..يم ماي
وجن أسمع الحره تصيح .. يماي
بعد عباس شمر وزجر .. يماي
يضربوني آواني الهاشميه

&&&&&&&&&&&&

عسن نهر الفرات انكطع .. مايه
اصيحن وين ياعباس .. مايه
الجيش ألي وصلنه سبع .. مايه
يحركون الخيم بعدك عليه

&&&&&&&&&&&&

حادي الضعن برض الطف .. وضعنه
أترده الحال وتغير .. وضعنه
فزعنه بخوف بالعاشر .. وضعنه
من حركو خيمنه ارجاس اميه

&&&&&&&&&&&

كفيلي دون يسره ودون .. يمنه
هجم جيش الاعادي وصل  .. يمنه
يم حسين وينج صحت ..   يمنه
خذو بنتج علـﯽ الهزله سبيه

&&&&&&&

مشيت وجدمي تتعثر .. وراكم
يخوتي اجساد عالغبره .. وراكم
يطول ايغابكم عني .. ورا كم
تجوني  للسبي لو هاي هيه

&&&&&&&

مثل جمر الخيم دهري .. وجرني
اجاني الشمر ضرباني .. وجرني
اصيح ابصوت ماواحد .. وجرني
وين اخواني خي يلحكون بيه

&&&&&&&&&

من طف كربله لليوم .. بي داي
كطعو بالسبي العدوان .. بي داي
اتذكر ادين الكمر .. بي داي
وهسه احبال معكوده  بديه

&&&&&&&&

طاح ويختي فوكه اجفوف .. علماي
ودري اطفال تبجي وتون .. علماي
اضلوع حسين متكسرات  .. علماي
ردت انهض لجن مكطوعه اديه

&&&&&&&&
للشاعر علي الفرطوسي

            ليش مفطوم بسهم عبدالله ليش
             بعد عينك يبني ماريدن أعيش
نام يمدلل عوافي نومتك .. نام وحذر لاﺗﻠﭼﻤك رﮔﺒﺗك
            ليش مفطوم بسهم عبدالله ليش
٭٭٭..................................................٭٭٭
جمرت أضماك بدليلي والجرح ﻴﻠﭼﻢ جرح
رﮔﺒﺗك يوليدي ترفه شنهي ذنبك تنذبح
ترد سالم ﭼﻧت أضنك لاﭼن بنحرك رمح
مو وكت نومك ييمه أشعر بجرحي ملح
        
         لـيـش ساكت ماتناغيني وتصيح
         صعبه يبني أﮔﺒﺎلي أشوفنك ذبيح
شنهي ذنبك ولأعادي صابتك. نام وحذر لاتلجمك ركبتك
          ليش مفطوم بسهم عبدالله ليش
٭٭٭..................................................٭٭٭
أبدال الماي يبني مرتوي بمنبع دماك
أشبدر منك ييمه وحرمله بنحرك رماك
يبني ماتحمل سهمهم أدري أشكد الماك
ﺗﺷﺒﮒ حسين بلهفتك يبني بس ذابل لكاك
        
          صغير نحرك يبني مايحمل سهم
          أشلون يبني أتحملت ذاك الالم
طير ﭼﻧك منذبح وبحسرتك . نام وحذر لاتلجمك ركبتك
         ليش مفطوم بسهم عبدالله ليش
٭٭٭..................................................٭٭٭


اشلون كفه السهم نحرك والسهم بثلث شعب
يبني نحرك خلي اشمه ﮔﻠﺒﻲ بيه نار ولهب
أوياك ارد اﮔﻌد وسولف وذكر ايام التعب
من رحت عبدالله يمه خدري يالغالي انسلب
        
          ليته أخر نفس هذه ليت اموت
         راح عبدالله وردت اسمعله صوت
روحي لوتصعد تحن ﻠﺷﺒﮔﺗك . نام وحذر لاتلجمك ركبتك
         ليش مفطوم بسهم عبدالله ليش
٭٭٭..................................................٭٭٭
المهد خلوني أﺷﺒﮔﻪ بيه ألك ذكره وعطر
منشغل بالي وأحسب يبني ماضلي فكر
موحلو كسر الخواطر يبني لاتنوي الهجر
أتعلمت هجر الحبايب ونته ابسن الصغر
       
      بعدك أصغير ورحت ناوي الرحيل
         واني بعدك دمعتي عالخد تسيل
ليش رايح يبني عفت الربتك . نام وحذر لاتلجمك ركبتك
        ليش مفطوم بسهم عبدالله ليش
٭٭٭..................................................٭٭٭
يبني أﮔﻌد وهزمدك ودمعتي أتغرﮒ المهد
وصرخ بنوحي وحناني غالي غالي يالولد
راح لب أحشاي مني ياهو الضلي بعد
اطلع امن الخيمه ادور ﮔﻠﺒﻲ أحسنه انمرد
    
     ياهوشايف ابني أسئل بالدمع
     نشف دمعي ونكسر مني ضلع
حنت الروح وتناطر شوفتك . نام وحذر لاتلجمك ركبتك
     ليش مفطوم بسهم عبدالله ليش
٭٭٭..................................................٭٭٭
يبني ست أشهور عمرك ماشفت سن الشباب
أمن الزمن ماخذ نصيبك مثل أبوك أعله التراب
أعله الرمح راسك أشوفه وجسمك مخضب خضاب
مانشف جرح النحبهم ﻴﻠﭼم وماضنه طاب
           
      يبني راسك منرفع وي راس ابوك
            تشبح بعينك علي لو ألموك
عالرمح ضلام يبني الشالتك . نام وحذر لاتلجمك ركبتك
           ليش مفطوم بسهم عبدالله ليش
٭٭٭..................................................٭٭٭
           للشاعر علي الفرطوسي

سمي بسم الله وكوم / ياهله يمسلم
هاذه يومك هل اليوم / ياهله يمسلم
زلزل ابزلزالها .... ياهله ابخيالها
              """"""""""""""
سمي بسم الله يمسلم خله يحتار الخصم
كوم ياصرصر زمانك ورعب اشباه الزلم
عمك ايعرفونه حيدر ونته بيهم لا تهم
( اليوم تجزونَ العذابي) اتلي الايه ابعزم

عذب اهل الطاغوت /ياهله يمسلم
روح وبزودك فوت / ياهله يمسلم
لاتخلي ارجالها .... ياهله ابخيالها
               """"""""""""""
كوم وبزودك يمسلم افكس اعيون الحرب
صفي الكوفه اعله ايدك مايرد كلمن يطب
همه الجابوك ليهم همه من كتبو كتب
انثر أعليهم مأسي وكل كلب انشر رعب

لاتهمك لعداد /ياهله يمسلم
ونته عزمك يزداد/ياهله يمسلم
دهور انته احوالها .... ياهله ابخيالها
                """"""""""""""
ضهضب أعليها وتوسط وسط ذيج الغضبره
بصولة الكرار صول وسوي بيها الما جره
ول دنالك ابحسامك شيل روحه ومنحره
انته من ابطال هاشم دري بيك المادره

عمك الشال الباب /ياهله يمسلم
بيك زود ابوتراب /ياهله يمسلم
غنم سوي ابطالها .... ياهله ابخيالها
                """"""""""""""
(بِأَن رِبك اوحى  )أتلي اليوم سورة زلزله
أطبك الكوم ابيمينك اخره اعله أوله
كون كلها اتصيح هذه الي برز عقد الوله
علي ثاني هذه يمكن لوكفيل العايله

عسكر وكله احتار /ياهله يمسلم
اصلهم حر النار / ياهله يمسلم
خل تطيح احمالها .... ياهله ابخيالها
                """"""""""""""
علي الفرطوسي

جارت اﭼـفوف الغدر .. والصبر عاف الصبر
بالبقيع اﭼـم گبر .. يالمهدي مهدوم
             ********
يابوصالح الك نبدي بالسلام
ياإمام الناس ياخير الانام
الدنيه غابه بلاشمس عم الضلام
بالبقيع انهدم گبر اجم امام

رجعت التعبد وثن .. والقبور تهدمن
لامناره ولاصحن .. هم عندك  علوم
********

الي هضمت كبد حمزه عاودت
ورجعت ام الجمل بالدنيه طغت
بالبقيع اقبور عدنه اتهدمت
وراية اهل الجور يالمهدي عِلت

عبدو الات وهبل .. كل فكرهم بي جهل
ياابن خير العمل  .. الطلعه يايوم
********

الحسن يالمهدي مضلوم اشكثر
الي سمو ﭼـبده رجعو للگبر
هدموه وﭼـان ضنهم يندثر
نور الله يبقه رغم اهل الغدر

نوره مايطفه ابد .. نوره من نور الاحد
الواحد الفرد الصمد .. مايطفه ويدوم
********
ياعلي السجاد الك ونه شجيه
ادري بيك جروح من الغاضريه
يلي شفت حسين ضل جثه رميه
انته نورك باقي من نور الثريه

تذكر بذهنك صور ..  باقي بمتنك اثر
بگبرك ينوح الحجر .. يل دمعك دموم
********

على الصادق گلبي غاطيه الهضم
حير الدنيه بمفاتيح العلم
الباقر اعليه اشأسولف وشأضم
اقبور رحمه بياذنب شو تنهدم

بعيني ضل ينزف نهر .. حگي لو اشبع قهر 
اعله اسياد البشر .. ضل گلبي مالوم
********
اعله ام الاربعه اعمي يعين
هاي باب الله الوسيعه ام البنين
الخِلّصت كل العمر نوح ونين
عمر خلص تلفض وتنعه الحسين

الله خصها بمرحمه .. احدى ابواب السمه
بل الگبر هي لاطمه .. يحسين مضلوم
********
الحسن من الضلم مجروح گلبه
الصادق وزين العباد يناجي ربه
الباقر ينادي الفرج ياربي قربه
وم لِبنين بدمع تقراله ندبه

للعرش نور وعرج  ..  يدعي ياربي الفرج
حجج تدعي للحجج .. الفرج يايوم
********
للشاعر علي الفرطوسي

               ابْكي جَزوعا .... لحبيبي الحُسين
            صِوتي صدوعا .... لحبيبي الحُسين
                       
                           ******
            انه قصتي اويه الدمع قصه عجيبه
              من تمر فاجعته عاشور الغريبه
            كلبي لجله  امعاشر أونينه نحيبه
             ياحبيب اليكدر ايفارك حبيبه
            وانه ادري حسين ضل جثه خضيبه
             حِكي لوابجي واعيش ابهل المصيبه
            
            اعِشقُ الدُموعا ... لحبيبي الحُسين
                         ******
            عل  البجي عدنه الروايات احنه كثره
            البجه اعله حسين دمعه تضوي قبره
            وحنه موقصة اجر  بجانه  امره
             ياغريب اعله الترب مكطوع نحره
             ابين عدوانه غريب ومن ينصره
             والله ماتطفه لمصابه تبقه جمره
      
              رأسٌ قَطوعا ..... لحبيبي الحُسين
                         ******
             ماكفاهم  امر سلبه ولا ذبحته
             ولا كفاهم الحجر الطر جبهته
             اتعنو ابنيران رهبو كل اسرته
            راسه متعلي ابرمح وتشوفه اخته
             والشمر اعله الحرم طلع حركته
            وبمتن زينب  اثر ضلت ضربته
 
            كَسرُ ضلوعا .... لحبيبي الحُسين
                       ******
           نقره بل المقتل عله الاكبر وجسام
           حين ما استشهدو من كثر الاسهام
           للمخيم رجعاهم حسين بالام
           ومن عله صدر الحسين الشمر من كام
           وقررو حرك المخيم فوك الايتام
           احتركو الاكبر وجاسم وصط الخيام
           
            احرِقو جموعا ....لحبيبي الحُسين
                         ******
           مختصر هذه الحديث القصه اروع
           والله حكي لو انوح اعليها وجزع
           اجزع اعله الحره المسبيه تطلع
           أوعله احسين الذي جسمه توزع
           والقمر عل المشرعه نوره تشعشع
           والرضيع امن العطش جبده تصدع

           قُصتاً هَلوعا .... لحبيبي الحُسين
              
      ****** ****************  
             للشاعر علي الفرطوسي         
     
          
          
          
       

قصيده.  لشهر محرم الحرام.  للعليله
..........    .......... .........  .... 

فارﮔﻮني .... بالغرب .... فارﮔﻮني
عـذبوني .... بالسفر .... عـذبوني
هذه حالي .............. يضل خيالي
        سارح ويذكر صور
               ♣♣♣♣
أبتدي بقصة حياتي الماجزع منهه المصاب
وبتلّه جـسـمي ابـمـواجع من كثر الآمه ذاب
طفله والباري أمتحني وماشفت سن الشباب
موتي أحسن من حياتي ليته أيضمني التراب
دمعي يكتب ... قصتي  ... دمعي يكتب
ضلت أتشب ... حسرتي ... ضلت أتشب
من شفتهم . أعرفتهم . أهلي ناوين السفر
               ♣♣♣♣
العليل أبعازت أهله لوتعب جسمه ونحل
وأنه أبوي حسين سافر وحدي ضليت أبأمل
ياأهلنه أبصوتي أصرخ وحدي ﭽﺎ ألمن أضل
من بعدكم جسمي يصبح مركز الكل العلل
جسمي يتعب ... لورحت ... جسمي يتعب
ﻓﮕدك أصعب ... من ألم ... ﻓﮕدك أصعب
الموني .فاركوني . طفله ماأحمل هجر
                  ♣♣♣♣
ﭽﻨﻲ مو منكم يهلنه من نويتو أعله السفر
حمليتو وانه يمكم أنضر أبعين القهر
روحي شبت من مشيتو بالمواجع تستعر
ماشفت قبلي عليله الاهل منهه تطر
ماني منكم ... حسبت ... ماني منكم
من سفركم ... ماطبت ... من سفركم
علّتي زادت . روحي ذابت . ودعت ليل وكمر
                  ♣♣♣♣
أسرح أبعالم خيالي ألي ماطاب وجريح
صوره العبد الله اشوفن ﭽﻨﻪ أيناغي ويصيح
أركض أعله الباب أدور أعثر أبثوبي وأطيح
ﭽﻨت أضن بالباب أشوفك تمسح أدموعي التسيح
عيني تربي ... أعله الدرب .... عيني تربي
هذه كلبي  ....  دم نزف ..... هذه كلبي 
صرت أناشد . بلكي واحد . جايب أخبار أبتشر
                  ♣♣♣♣
مشت روحي أعله الضعينه تنشد أبطول الدرب
ﺑﻠﭽﻲ شفتو حسين أبويه أسئل ودمعي يصب
بس جسد خلوني أهلي وبلضعن راح الكلب
مدري أدور أعله كلبي مدري أدور أعله المحب
كلبي حاير ... لونشد ... كلبي حاير
شنهو صاير ... ياهلي ... شنهو صاير
روحي عدكم . وبأ لمكم . مني دلالي أنعصر
                   ♣♣♣♣
      ♠♠  الشاعر علي الفرطوسي ♠♠







            

  قصيده لشهر محرم الحرام .. ليلة علي الاكبر

.........  ........   ........   .........    .......

  يبني أرعب هاي أميه ... علي بويه ياعلي
    يـبـنـي روح ورد ألـيـه ...  علي بويه ياعلي
 بالعِلم والمعرفه ................ تشبه أنته المصطفه
         علي بويه ياعلي ....  علي بويه ياعلي
                         ♣♣♣♣
              ذخرتك للـشـدد يبني وسلوتي
              يسباح الكلب روحي ومهجتي
              يـبـويـه يشهد الله وي غربتي
              يالـكـبـر أنـته بالدنيه نضرتي
      يـبـنـي ياسـباح كلبي ... علي بويه ياعلي
      بمولدك رزقاني ربي ... علي بويه ياعلي
ألك روحي أملهفه ................ تشبه أنته المصطفه
                       ♣♣♣♣
               صور للفاجعه بالطف نشاهد
               وداع أويه الولد بدموع والد
               طلع للـمـعـركه الاكبر يجاهد
               وضل حسين لوليده يشاهد
        شاهد أبنه من ينازل ... علي بويه ياعلي
        ﭽنه حيدر من يقاتل ... علي بويه ياعلي
والجيوش أمصففه ................ تشبه أنته المصطفه
                       ♣♣♣♣
               طلع لكبر يجاهد ليه مارد
                شبيه المصطفه المرسل محمد
                عليمن هالجمع كله تحشد
                برعم روحي بالحومه تورد
      ثمرت حسين التغرب ... علي بويه ياعلي
      بالدمه نوره تـخضب ... علي بويه ياعلي
ومْه تنضر واﮔفه ................ تشبه أنته المصطفه
                       ♣♣♣♣
               
                 من طاح الولد بالدم خضابه
                 أبتدت لحسين لوعاته وعذابه
                 راسم عالجفن صورة شبابه
                 بغياب الاكبر اتقرب غيابه
      بعيني الدنيه مضلمه ... علي بويه ياعلي
      كـلـبـي وكـلـبك تدمه ... علي بويه ياعلي
يبني عالدنيه العفه ................ تشبه أنته المصطفه
                     ♣♣♣♣
                 كل حيلي انهدم بالحومه يمه
                 يبويه انده وحشم ساعه اشمه
                 ساعه الصدري ابلوعاتي اضمه
                 وخضب شيبتي من فيض دمه
     انه ابوك ورد عليه ... علي بويه ياعلي
     يبني ادمومك جريه ... علي بويه ياعلي
منحرم من الصفه ................ تشبه أنته المصطفه
                        ♣♣♣♣
               رجعت اعله الخيم وصفك بديه
                بعدك يبني أتمنه المنيه
                أمك طلعت وتنضر اليه
                تكلي وين الاكبر الشفيه
      ليله صاحت ياعلي ... علي بويه ياعلي
      بعدك امك تنولي    ... علي بويه ياعلي
يبني ياذيني الجفه ................ تشبه أنته المصطفه
♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣♣                
   الشاعر علي الفرطوسي

قصيده لشهر محرم الحرام .. ليلة الانصار
..........   .........   ........    ..........


صاحت الانصار بصوات الضمير . نصرتك واجب علينه
,,,,..........................................................,,,,

أعتله يم الخيم صوت الضمير .
من حبيب وعابس وجون وبرير.
مانعوفك سيدي أبلايه نصير.
نفدي أرواح أبمحبتك ياحسين . عهد يمك عاهدينه

,,,,.........................................................,,,,

نعلي راس أم الخدر بت حيدره
جينه كل واحد يقدم منحره
ألهه خدام ونسوي الماجره
فدوه ها الارواح دون أم العفاف . لاتضل زينب حزينه

,,,,.........................................................,,,,

الموت مضمونه أختلف صاير شعار
مـن دمـانه أنحقـق العـز والـوقـار
والـشـهـاده أتـجيب أعضم أنتصار
ثورة الدم تهدم أعروش الضلال. وحنه دمنه لحب ولينه

,,,,........................................................,,,,




لبسو أعله أدروعهم حب القلب
قررو عالطف يكلبونه كلب
المستحيل أيصير من أجل المحب
كل رمح أصبح يسجله مجزره . والكلب فايض حنينه

,,,,.........................................................,,,,

صار يوم الطف مثل يوم الحساب
والخيول أنصبغة أبدم الركاب
زلزلو طف كربله ذوله الصحاب
ثار بركان الغضب وصط الجمع . غيضهم يرعد ونينه

,,,,..........................................................,,,,

جون يكتب عشقه أبسيل الدموع
قال حب حسين عدي أنه ارقه نوع
بعدماهم ما أخاف أمن الجموع
مزق أثيابه ومشه ﻠﺣﻠﮒ السيوف . بالجنون أمبضعينه

٭٭٭...........,,,علي الفرطوسي,,,,...........٭٭٭

قصيده لشهر محرم الحرام .. ليلة ابوالفضل العباس

.... ...........  ..........  .....  

بيمينه ايرف علم       كمر كمر كمر
يطشرهم قسم          كمر كمر كمر
سيفه ابيمنته            زينب حيته
          *******
هذه الكمر راعي الجود  رف العلم بيمينه
بعيونه ايبين غيض  من تشتكيله سكينه
اباب الخيم شاف حسين محني دمعه بعينه
من العطش تشكي اطفال عبدالله زاد ونينه
عليه لاك الزعل          كمر كمر كمر
علي جنه وحمل          كمر كمر كمر
ترهب صولته             زينب حيته
            *******
ايصد على اعضيده اينوح ضل وحده أبلاناصر
متروس غيره العباس  كلبه عليهم  شاجر
سكنه تجيه تطلب ماي وتكطر دمه النواضر
ما احتمل راعي الجود ماهمته المخاطر
يريد اعله النهر     كمر كمر كمر
زرع خوف وخطر  كمر كمر كمر
يترس جربته    زينب حيته
   ***************
صيوان اخته اتعناه قبل الدخول استأذن
يودعها وتودعه انوب ودموع زينب هلن
لوتمشي يابو النوماس هالحرم المن يبقن
بعدك خدرنه أحنه ايضيع كون الخيام اشتعلن
يكفال الخدر     كمر كمر كمر
انترس كلبي قهر  كمر كمر كمر
رايد طلعته    زينب حيته
   ***************
امواعد اتجيب الماي منك كفو يكافل
فوك المهر ول شافاه جنه تعنه راجل
حته الارض ترجف خوف من هيبته بوفاضل
هيبة علي بانت بيه ياسيد المراجل
يصكار الزلم    كمر كمر كمر
يطشر أويلم   كمر كمر كمر
تذبح خزرته    زينب حيته
   ***************
طب عالفرات العباس ومن عده تارس جوده
كل همه يوصل الماي لسكينه يوفي اوعوده
حاطه العدو من كل صوب ومكطعات ازنوده
ناده لعضيده يحسين وعين الكمر ممروده
ابوفاضل وكع  كمر كمر كمر
ولحسين استمع  كمر كمر كمر
طاحت دمعته    زينب حيته
   ***************
محني الضهر جاه حسين يتعثر ابكل خطوه
ماأرجع اله انته أوياي حلفتك وبالخوه
 صدر العقيله مخنوك وانه صفيت ابلوه
شخبرها زينب اعليك هل تنتضر ياسلوه
تموت ام الخدر   كمركمر كمر
من تسمع خبر   كمر كمر كمر
كمرها وفكدته    زينب حيته

   ***************
للشاعر علي الفرطوسي

قصيده لشهر محرم الحرام.  ليلة العليله
على لحن ملا باسم .. ليله اعله ليله
.....  ...   ......   .......   .....

حسين ابرحيله ... بجه العليله
*********************
بالسفر طوح ابوها راح الحسين
وهيه تصرخ يا أهلنه وين ماشين
يل خذيتو كلشي مني وعفتو ثنين
بس حنين الكم يبويه ودمعة لعين
والتشتكيله ... بجه العليه
*********************
والله ونته كلبي ماكو تصير منها
علميت ام الفصيل اتون لبنها
روحي حين الي مشو ماتت عسنها
وانه زينب عودتني اغفه بحضنها
حضن العقيله ... بجه العليله
*********************
من مشيتو هالكلب شاجر لهيبه
من سفركم هذه لن عشت بمصيبه
شنسه منكم ياحبيب وياحبيبه
دهري طشر كل هلي وانه غريبه
برحله طويله ... بجه العليله
*********************
راحو وخلولي ذكره بس صورهم
عمري ناذرته انتضار وانتضرهم
علتي زادت والله كله من سفرهم
بله ياطير الحزن ودلي خبرهم
الطير ابعويله ... بجه العليله
*********************
الي مثلي ابهل المرض يمها الحبايب
وانه خلاني ابويه وكلبي ذايب
يمي بس ام البنين اتون تعاتب
من بجيها اضغير كلبي وصار شايب
المدمع تسيله ... بجه العليله
*********************
علي الفرطوسي

 قصيده لشهر محرم الحرام  . ليلة القاسم

.........   .....  ......  ...... .........

وردت الياس   اشجاباها لطف
تحمل وحساس   خوفي تنشف
جله لخلق هالورده  تتفتح بكل سجده
    ***************
يبني اترف انته امن الورد  .. خليني ابوجهك اصد
                            ياجسام
بكل خيمه عطرك بيه نشم .. ورده وتفوح اجمل نسم
                             ياجسام
جاباني دهري لكربله .... اشفاك يبني ذابله
                            ياجسام
برعم تفتح بالحرب ... كل خوفي  يمه ينضرب
                             ياجسام
تسئل الناس      عن جمالك
ماشفت غير      من كمالك
يحفضك حُسين وجده  جله لخلق هالورده
    ***************
عمك وحيد بخيمته ... انصاره قله لنصرته
                            واويلاه
يوليدي قدرك خيرك   ... بين الزفاف ومقتلك
                             واويلاه
جسمك يبعد امك ترف ... تذبل ولاتحمل نزف
                              واويلاه
حته الخيم ترجف تون ... ومتوشحه بثوب الحزن
                                 واويلاه
كل الخيام        تبجي بوداع
تنطفي شموع   والفرح ضاع
جاسم مشه وشيرده  جله لخلق هل لورده
    ***************
يبني ويسلوة روحي ... مذبوح يامذبوح
                          بالحسرات
اشعلك العشره شمع ... عدنه فرح ألمن دمع
                           بالحسرات
بعد امك وثوب الفرح ... لكلبي ياجاسم جرح
                           بالحسرات
امحدبه اباب الخيم ... دلالي عصراه الالم
                            بالحسرات
عرسك اشلون     وذبحك اشلون
يوليدي جسام      والله شيهون
ذبحك كليبي ايمرده .... جله لخلق هل ورده
   ***************
وينك وين الحرب   ... ارباك شيب للكلب
                       بعدك شاب
ثوب الحرب مالاك الك ... معرس جنت اتأملك
                        بعدك شاب
ربيتك لوكت الكبر  ... اتنزلني بيدك للكبر
                         بعدك شاب
دهري فجعني بكربله ... ابني انذبح ونضر اله
                           بعدك شاب
حلمي شوصار    بيدي ادفنك
يمه اشلون         يل دافي حضنك
ويايه دهري اشعده .... جله لخلق هل ورده
   ***************
اشكر الاهي وحمده  .... من عدي يقبل هل فده
                           لجل حسين
كل عمري وابني فده ... ويسلم حسين امن العده
                              لجل حسين
دونه العمر مابيه ضوه ... بريتي يفتر كل هوه
                            لجل حسين
يوليدي وجهي بيضه ... كلب ام حسن بلكي رضه
                             لجل حسين
مروتك يجسام     أتبيضه وجهي
يم لحسين           افديته ابني
بيضت وجهي عده جله لخلق هالورده
   ***************
للشاعر علي الفرطوسي



 

نزله لعلي الاكبر .. لشهر محرم الحرام
.......................

نوحن يعلو يات . ودعن علي اباهات
            وايلاه واويلاه
             ...............
صاح الحسين وعله اوليده تخصر
يله علويات ودعن علي الاكبر
بعد هاي ال لحضه عمري ليته يكصر
انحنه اعله وليده ايحبه وتحسر
نزلت دموع حسين .. يبني وينور العين
  واويلاه واويلاه
.........
يبجي حسين ويون يم المخيم
ابنه راح امن ايده وكلبه تألم
من بعيد ايراقب الاكبر  تقدم
اوداع ماشاف الفرح بعده وتبسم
اوداعك علي شيهون .. يبني الكلب محزون
.....
من بعيد وناضر ابنه حاطته الكوم
من مكانه حسين صار أيطيح ويكوم
حافي لبنه اتنعه وينادي يمضلوم
يبني عالدنيه العفه امن العذب محروم
محني الضهر وينوح .. لوليده المذبوح
.....
زينب اتكول اني اخوي وماعرفته
محدب ويتعثر انضرله بخطوته
حسين اخوي وهاي والله مو وكفته
محني ضهره وكاسر ابصدره حسرته
متغير ومكسور .. حكه ابنه المنحور
........
حكه لوينكسر حكه لوتغير
هالمصايب الحجر منها ايتفسر
جم عزيز ايفاركه من بعد الاكبر
الحزن عالغالي يكثر والله يكثر
والفاركه المحبوب .. كلبه يضل مصيوب
........
للشاعر علي الفرطوسي