طالع علي من الخيم     لو طلعت الروح
ليش النحبه بالعجل      يـادنـيـه يــروح
ودعته وكلبي بوداعه    الـلـيـله مـذبـوح

✵✵✵✵✵✵✵✵✵✵✵✵✵✵

ودعته ياليلى الولد ونتي اندعيله
إتوجهي لربج بسم حامي دخيله
لو راح الاكبر كل حياتي مستحيله
ياليلة وداعة التمرني شلون ليله

نضراته تجرحني الولد       من ودعاني
كل خطوه ترميني بسهم   اه يازماني
يامهجه الروح او وداعك    زود جروح

✵✵✵✵✵✵✵✵✵✵✵✵✵✵

يـبـني يـشريان الـكـلـب ياسـلـوة البيت
ودعـتـك وكـل عمري راح ويـاك حسيت
فراك الولد يحني الضهر ولضهري كسريت
بالـخـيـمه امـك تـدعي وانه عيون هليت

ياالاكبر امك غيبتك        كسرة ضهرهه
يوليدي سالم ارجع         وكحل نضرهه
ناضرها يبني لرجعتك     ياعلي مشبوح

✵✵✵✵✵✵✵✵✵✵✵✵✵✵

يوليدي من تدخل على الحومه وحربهه
ياعـلـي يـل تـشـبه علي وسيفك ضربهه
الـحـرب حـربك يـبـنـي يـازلمه اليطبهه
مـن تـنـزل الـكل  تـنـهـزم  ضـيـع دربهه

كلهم علي وجدي علي    وعمي انه عباس
الحومه هايه حومتي     والكرب ينداس
سيفي بيميني بالحرب    عالعسكر يلوح

✵✵✵✵✵✵✵✵✵✵✵✵✵✵

رجعيت الي من الحرب تكشي الضمه وياك
ثـقـل الـحـديـد ادري اجهدك  يوليدي واذاك
تـدعـيـلـك  امـك بالـخـيـم  الـبـاري يـرعـاك
ثـانـي  وداع  ومـن تـروح  تردلـي  بـدمـاك

اخر وداع اويه الولد      عماته وامه
وحده التكض برجابه    واحده التشمه
هالروحه جنها ابلالقاء    جم جرح مفتوح

✵✵✵✵✵✵✵✵✵✵✵✵✵✵

انضرلك وكلبي نخمش من باب الخيام
عطشان يبني من طحت ومطبوره الهام
دمك  تطشر  عالارض  وترميك  الاسهام
تعنيتك اركض واعثر  (وامرخي ) اللثام

بعدك على الدنيه العفه     يابويه ناديت
يبني وشبيه المصطفى     الضهري كسريت
امطبر ابني اعله الثره        ودمه مسفوح

✵✵✵✵✵✵✵✵✵✵✵✵✵✵
  علي محسن الفرطوسي

 

لحظة اوداعك آليمه     كلبي حاسس بـالهضيمه
ودعاني وكل خواتي      يمه خلصت كل حياتي

                   ***

لحظة التوديع صعبه ونته ناوي اعله الوداع
                  وبيك كلنه تمسكينه
الدنيه ماهي الدنيه بعدك  كلشي بي نبرة ضياع
                  صعبه لو يطلع ولينه
محسبه حته الريح يجرح من شمر ياخذ طباع
                  خوفي ايحرك  عبينه
الخيمه يحركوها بعدك وحنه نركض بالبقاع
                لوصحت ياهو اليجينه

هذه وكثر لو عفتني    وحضرت للسوط متني
وياك ضاعت امنياتي   يمه خلصت كل حياتي

                    ***

الليل مجهول اليمرني  وبضلامه شكد عذاب
            ضاع اخونه وحنه ضعنه
من كلتلي وداعة الله من كلمتك كلبي ذاب
               ومحنة التوديع محنه
خلي اشم صدرك يخويه وخلي ايدك عالحجاب
                بيك اشمن ريحة امنه
خيول ورماح وعساكر  تمزج الدم بالتراب
               ودمك انته غالي عدنه

من كلت اخر كلامك   وحشة صارت كل خيامك
وجم طفل لازم عباتي    يمه خلصة كل حياتي

                    ***

لورحت من عدنه خويه گلي بعدك  وين اروح
                  وياملاذ البي اماني
كربلاء صحراء جرده   وكلبي غازيته الجروح
                وتدري هجرك غيراني
لوتطيح يطيح عرشي  وحته عرش الله ينوح
                 اى  يكلبي شكد يعاني
صعبه لو إركب هزيله   وعالرمح راسك يلوح
                راح اكلك زينب اني

اني يحسين الاميره      لاكن إخذوني اسيره
من طحت طاحت غلاتي   يمه خلصة كل حياتي

                  ***

من بعيد انضر قتالك  واني اعثر بالعباه
            وعالوجه صارت وكعتي
شفتك امن المهر طايح  وكلبي ماادري شجاه
           والحجر هم طر جبهتي
ماشفت طولك يخويه  تهت مني ودربي تاه
            ياغلاتي وياحسرتي
تنذبح  كعبة حياتي حسين قربان اللاه
             وصوتك يردد يخيتي

صاير المذبح مكانك   واني محتاجه امانك
موتتك يعني مماتي    يمه خلصت كل حياتي
                 
                ***   

ودعتني انته اول  واني إودعك من بعيد
            رايحه بدرب اليسر
قبل جفك فوك جفي وهسه اغلال وحديد
            وحادي ضعوني شمر
فـجـر عـاشـر دوهناني مـنـي مـاخذ جم وريد
            اخذ مني اغله البشر
تذكرت من جينه للطف وكل اخوتي ايد بيد
            وهسه وحدي بالخطر

بالبشر ماكو مثلهم    عندي اخوه وافتقدهم
خدري جان اعظم صفاتي  يمه خلصت كل حياتي


                   *** 
للشاعر علي محسن الفرطوسي

قصيدة للتطبير
....

ليوم ٳطبر هامتي لجل الحسين                                           
حته ٳعيش مصيبته طول السنين
                 ****
اليوم اطبر هامتي وجري الدمه
حته اواسي حسين ومه فاطمه
لجله تبجي اليوم املاك السمه
واحنه شيعه ومايهمنه الايمين
 
                 ****

اي وحگ ظلعك يبن حامي الدخيل
اليوم اخلي الراس من دمه يسيل
ادري  بصدرك  تدوسه  اليوم خيل
منذبح من الگفه ومالك معين

              ****

اليوم تصرخ فوك راسي قامتي
جمره تسعر لجل حبك حسرتي
شلون ابخل بالدمه وبدمعتي
اصرخ وحبي يحير العاشگين

              ****

حته اعيش مصبيتك طول الدهر
كون واجب اطبر بعرگ النحر
وكسر ضلوعي وٳلطم بالحجر
ياذبيح وسلبوك الحاقدين

              ****
ياذبيح ومنذبح مثل الكبش
لجلك آمحنه بدمه اليوم العرش
ياذبيح ومانزل جسمه بنعش
عل التراب اواصل جسمه مگطعين
 
               ****
الگال شوهت الشعائر بالطبر
هذه جاهل حاله من حال الشمر
اني عاشگ والعشگ طول العمر
خلك بعقليتك واني الحزين
              ****
       علي محسن  الفرطوسي

يايمه ياعباس .. ياغيره يانوماس
هايه الوصيه .. للغاضريه
................
يمه اغيابك عليه والله ميهون
يابوفاضل انته روحي ونور لعيون
هاي من عندي وصيه من ترحلون
عن اختكم زينب اهناكه تحامون
يومك هذاك اليوم   .. من تنجمع هالكوم
جيوش ال ميه .. للغاضريه
...............
يبني اختك زينب بذمتك امانه
خوفي لاترعبها اجيوش الخيانه
ادري كلبك يبني ايفيض ابحنانه
من مشيتوا نشلع كلبي من مكانه
حادي الضعن من راح .. بيه راحل المصباح
ابن الزجيه ... للغاضريه
...........
يمه كل صبح ومسه بدرب الخذاكم
كلبي شاجر والله متعوده ابهواكم
دوم ادقق بالنضر وشتم هواكم
يل غوالي كلبي مالحضه نساكم
بضلوعي تلهب نار ... يوليدي كلبي احتار
صبح ومسيه ... للغاضريه
...............
بالسيوف الحره اختهم حجبوها
من مشه ضعف الهواشم ولد ابوها
قسموا  وكالو اختنه وطِلعوها
حته ريح الله اختنك من ركبوها
غطاهه راعي الجود .. اخوتها ذوله احيود
من البريه .. للغاضريه
.........
والله ياعباس الك مني تحيه
يبني يل كافل عقيله وهاشميه
بل العطايه يبني اجفوفك سخيه
يم اخوك حسين وجهي تبيضه اليه
يل بل الكرم معروف .. ول كل  علل موصوف
اجفوفك سخيه ... للغاضريه
.......
للشاعر علي محسن الفرطوسي

حين المشت زينب من برلها
جبيره ومن اهلها من برلها
رغم اليسر نصبت من برلها
وخطبتها تهز بعروش اميه


. علي محسن الفرطوسي.

تدري بيه  جننتني محبتك
تدري بيه  واهسي بس خدمتك

*
عن بابك شما ابتعد   مهما عِلّه بـﭼـفي المجد
لازم على عتابك ارد    يامن ملكت اوجودي
لوماأنوح بمجلسك     بعبره اختنگ وتنفسك
احسبني اني عابسك   يابس وخضر عودي
عيشني عمري بمآتمك   المامنـﭼوي امن مخيمك
لاعاشگ ولاهايمك      وفقني اوشد زودي

ياحبيبي  وفقني اخدم حضرتك
تدري بيه  جننتني محبتك ..

*

ندري اليمد ايده لبشر     ماتبقه اله قيمه وقدر
ومديت اله ايدي بفخر   رد ايدي الي مليانه
خليني اجيك بحسرتي   بعتبتك اجري عبرتي
يمك  اطول  گعدتي        روحي الك لهفانه
منين ماانضرك سمه        تمطر حنان ومرحمه
سبحان رب السلمه         گلوب الخلق وٳجنانه

مالي غيرك  . بصايت الله وصايتك
تدري بيه  جننتني محبتك

*

مدفون سري بكربله    شارع السدره اشتاگ اله
موكب يمر او قافله     اذكر ضعن مسبيه
 گبالي يصبح منضرك    حر الشموس مغيرك
بالصحن جن يم منحرك  تبجي عليك ارقيه
ماعايش اني مصيبتك    استحي من بنيتك
مشتاكه ليك وحضنتك   وبالصحن جم علويه


بعيد عنك . ماعشتها مصيبتك
تدري بيه  . جننتني محبتك

*

وفقني مولاي الجزع     ارزقني يحسين الدمع
 وكلبي القاسي ينفجع    من يسمع اللطميه
وبمجلسك اكنس بسط    ولكل مُعزي ﭼـاي احط
خليني اتعب وانفحط       وأثواب اوزع اميه
محزم انه بخدمتك         شاغل افكاري حضرتك
ومالحضه انسه مصيبتك   ساكن بالحسينيه

ابجي حركه . لوقرو بقرايتك
تدري بيه . جننتني محبتك

*

خليني يم بابك عبد     اسكي الرايح واليرد
واني اعرف الي ينطرد   من رحمتك ياويله
مولاي فدوه مروتك     غطيني بضل رايتك
كحل عيوني بنضرتك    مديت الك اديه
وعالتل اصليلك فرض   واباسمك يلبي النبض
هنياله كلب الي حفض   اسمه وكل طاريه

اني ضايع .  دليني امشي بحرثتك
تدري بيه  . جننتني محبتك

*

اللهم صلي اعله العزاء     واعله اليحبون البكاء
يمبجي عيون السماء       حزمني وبجيني
كالو زليخه تسودنت     بيوسفها حيل تعلكت
تعبت عليه ودورت       واني ادور حسيني
اليحب محبوبه بشغف   موهين ينول الشرف
عباس ادري اطاله جف  وكل للسهم شك عيني

مقصر اني . ذنوبي ادري اذتك
تدري بيه . جننتني محبتك

***

علي محسن الفرطوسي

 

بخيلهم وصلوني .. عالجمر مشوني
      والخيام أمحرگه ياخويه
...........
روحي طلعت من كهفها أدخيلك
لجل عيني خويه أجل أرحيلك
العزيزه اختك انه  وأشكيلك
انهدم عباس حيلي وحيلك

هجمت الخياله .. حسين هاي اطفاله
              ياخويه
.........
اني خوفي عل الصغار امن الجمر
وين اضمهم والمخيم تستعر
محيره لاراي عدي ولا فكر
بعد عباس الكمر يفتر شمر

ليتهم ذبحوني .. ولا اجو طلعوني
             ياخويه
.........
اطفال تركض عالجمر ومحيره
تصيح وينه عمنه سبع الكنطره
طلعت ابين الزلم لمخدره
ونته جثه مخذمه وفوك الثره

خويه نور اعيوني .. بسوطهم ضربوني
                ياخويه
.......
تفتر الحره اعله وحده امن الخيم
بيها ضل باقي العليل وماسلم
من لهب نار الخيم جدمه انلهم
شالته وتتنخه شيال العلم

كافلي ماجانه . . امن الخطر بعدانه
              ياخويه
.....
اى يحيرت عمري ودمعي اليصب
جم جرح من كربله وسط الكلب
خويه متني بغيبتك ضل ينصرب
وبثيابي نار المخيم تشب

فوك نار اخيامي .. تمشي هاي اجدامي
        ياخويه
....
علي محسن الفرطوسي

يروى انه عندما ادخلوا السبايا على يزيد لعنه الله ...
أعطوه راية جيش الامام الحسين ،ع، فلاحظ عليها كثرة ضربات السيوف في كل مكان ماعدى مكان قبضة اليد...
فتعجب يزيد من كثرة الضربات في عمود الرايه وقال من كان يحمل هذه الرايه لقد دافع عنها كثيراً وتحمل كثيراًمن هذه الضربات...
فقالوا له كان يحملها العباس ابن علي ابن ابي طالب ..
فقام يزيد من مكانه وقال قولته الشهيره ....أبيتَ اللعن ياعبّاس!!! يعني مثلك لا يلعن يا عباس هكذا تكون الرجال
السلام على قمر بني هاشم

ياأول عشك بالمهد ناغاني
وياأول حبيب الدرت وجهي اعليه
شفته بعين كلبي وهوه شافاني
هوه العنده مثلك والله مايحتار
من تضكني الدنيه اشوفنك وطن ثاني
ياسر انته عندك واملكت هالناس
كلها تصيح حب حسين جناني
ياحضن الامومه وياحنان الاب
شما ابتعد عنه يمه تلكاني
انه بحجم الذبابه شما كبرت بيوم
بس حسين يمه ملك سواني
اسولفلك شعر وحتار شكتب بيك
ونته كل عضو من اعضاك رباني



... يااباعبدالله دخيل مروتك

ركضت وشافتها عيون الحرام
والمثلها شلون تطلع حافيه
اخت ابو زنود الثجيله والغيور
خيمها متوجره بعد ماطافيه
الليله زينب مالهه واحد كفيل
يامسية الشوم موش العافيه
#علي_محسن_الفرطوسي

مشايه / وي الامام المنتضر
مشايه  / لاهمنه خوف ولاخطر

*********

طالع بهاي المسيره .. بدمعة عيوني الغزيره
بكلبي حب حسين ديره .. مملكه وكلش جبيره
عشك مايوجد نضيره .. انه شيعي وكلي غيره

مجنونه مجنونه /  بكل خطوه يصيح الكلب مجنونه
لعيونه لعيونه     /  فده هلي وكل دنيتي لعيونه

*********

عايف اهلي والحبايب .. كلبي بحبه انه ذايب
شكرن لكل المواكب .. طفل يخدم ويه شايب
رغم كل هاي المتاعب .. الاجر يم ام المصايب

تحميهم تحميهم /  ام الخدر بت حيدره تحميهم
تنجيهم تنجيهم /  يوم الحشر من اللضه تنجيهم

*********

شيعه عالموعد اجينه .. هالمشي واجب علينه
المهدي يمشي وي مشينه .. كل تعب مايضل بينه
جينه نواسي الحزينه .. رجعت بذيج الضعينه

يدروني يدروني / بعيوني مرسومه الخيم يدروني
خلوني خلوني  / ارد اشعر بذاك التعب خلوني

*********

معتني وبجفوفي رايه .. عاشة بروحي السبايه
درب ابو اليمه هدايه .. الله خصني بهل الولايه
ماإهاب امنل المنايه .. حسين عودني اعله هاي

ماعوفه ماعوفه /  حسين سواني ملك ماعوفه
بجفوفه بجفوفه / وبخيره عايش للابد بجفوفه

*********



للشاعر علي محسن الفرطوسي

قصيده للمشايه
........

نبض الگلب كل خطوه اخطيهه   حسيناه
طول الدرب كل خطوه اخطيهه   حسيناه
فدوه انه ٳروح الونك   مايسوه عمري بدونك

***********

لمعشوگي كاصد كربله ودمعي يهل
ياناس سودني الهوئ ولا ماٳمل
مجنونه وتباهه على اهل العقل
ملهوفه روحي الگبتك ﭼـايمته اصل

عاشگ وسولف بالدرب تسمعني وياه
هوه حياتي ودنيتي وينساني حاشاه
واني افتخر مجنونك     مايسوه عمري بدونك
    
***********

سودني حبك بيه شمسوي الهوه
عطشان گلبي ومن نهر عشگك روه
امشيلك وشايل الك بيدي لوه
ياسر حياتي ونشٲتي طف نينوﯼ

يل مانسيتك ونته ماتنساني يحسين
الحمدالله إتوفقت وي الي ماشين
فدوه رحت لعيونك     مايسوه عمري بدونك

***********

كربله ياكعبة عشق بيها اغله احباب
سرﭺ عجيب بكل سنه آتجمعين الاقطاب
مشايه جينه وكاتب حسين اعله الابواب
فاتح مضيفي بكل وقت للطالع وطاب

ياهله بزواري الاجوا گرولي العين
صدري مضيف استوعب الاف الملايين
واني صرت مرهونك    مايسوه عمري بدونك

***********

اذن اذان الاربعين بصحن عباس
من كل مكان تعنتك تتوافد الناس
ويه كرُيات الدم انته اويه الانفاس
وكل الحواس الخمسه منك تاخذ حساس

ٳمحزمه الناس الك شيب اويه شُبان
ياملجٲ لكل الديانات وايه الاوطان
صرخات الي يكصدونك    مايسوه عمري بدونك

***********

الحمدالله خادمك شاءت الاقدار
والعنده مثل حسين بالدنيه ملك صار
يوم الحشر ماتنفع اموالن ولا انصار
ينفعنه بس حسين واحنه اله زوار

خطواتي ترتيلة عشگ واتليلك ايات
يالطولك بطول الارض وعرض السماوات
كل البشر يردونك    مايسوه عمري بدونك

***********
علي محسن الفرطوسي

قصيده للمشايه
..........

خطواتي تتسارع الك يبنَ فاطمه
يحسين جيت اتوسلك  يبنَ فاطمه
محبوبي محبوبي حسين

....

انه اول آصياري وصرت مجنونك
ماتسوه حياتي حسين من دونك
جل  الخالق السوه اليخدمونك
حته  المايلين  يلين  لعيونك

محبوبي محبوبي حسين

.....

المحبس ماله قيمه الماأله شذره
بلايه الماي خشبه تصبح الشجره
واني وياك مو يومين الي عِشره
 وعرفت المايحبك موبشر صخره

محبوبي محبوبي حسين
...

ربي وفقني لخدمته بكل دعائي
وكل سنه امشيله بنوحي وبكائي
اني جندي لسيدي وصاير فدائي
كل سنه ابابه اروح اعقد ولائي

محبوبي محبوبي حسين

...

الطير مهيوب بجناحه وريشته
واني مهيوب بحسين وخدمته
خادمك  متعني  بيده  رايته
بعزمه يوصل للحسين وحضرته

محبوبي محبوبي حسين
...

المايشوف الشمس بعيونه العمه
بالنجم والقمر كشختها السمه
الكاع لوله حسين يكتلها الضمه
المشالك خطوه فرح فاطمه

محبوبي محبوبي حسين
....
علي محسن الفرطوسي

يارمح راس الذبيح ... أعله هونك لايطيح
يشبح أبعين الكفيل ... بهيده لورايد تميل
                   *
      يارمح شايـل سـنـانك أبـو الـغـيـره
     وانه جـبـتـوني بهـضـم زينب أسيره
      راسه مرفوع أَبرمح شيخ العشيره
     لاتـهـيـج جـرحـه أبـهـاي الـمـسـيـره

أعله الرمح دمه يسيح ... تلجم أبنحره الذبيح
معذب برمـحـه اليشيل ... بهيده لورايد تميل
                     *
       ياهوه العالي أعله هونك لاتجرحه
       بعده مايابس يلـﭽمه حـسـيـن ذبحه
      ﭼنت أمسيه أبسمتي وﭼننت أصبحه
       يارمح خليني أشمه وبيدي أمسحه
أرد أشمنه الشهيد ... يادهر مني أشتريد
معذب أوياه الدليل ... بهيده لورايد تميل
               

       يلي شايل راس أخوي أبهيده أمشي
       لوتـحـركـه ويـﻠـﭽـم يـنـضـر الـوشي
       يارمح بـس نـزله ألـيه وأخـذ كـلشي
      من بعدهم اخوتي الناكه عرشي
والجرح ماضن يطيب ... يلـﭼـم أبراس الحبيب
بـﻠﭽمته أصراخ وعويل ... بهيده لورايد تميل
                      *
      ياشمس غيبي أعله راس أحسينه
      هـذه راسـه المرتفع وجسمه وينه
      لاتطولين أعـلـه جـسـمـه أتغيرينه
      ولاتصدعين أعله راسه أتيـبسينه
ياشمس رداﭺ أبوي ... بهيده حرﭺ أعله أخوي
أعله الترب جسمه نحيل ... بهيده لورايد تميل
                     *
        يل تشيل الراس رمحه لاتهزه
       أجروحه خلهن نايمات ولاتفزه
       عـذباه الشـمر لـمن أجـه وحزه
       جرحه بعده حسين يدي ولاتبزه
بعده جرحه أينز دمه ... خل تشوفه فاطمه
وانه حرمه أعله الهزيل ... بهيده لورايد تميل
**********************************
  للشاعر علي الفرطوسي

 
      

ياناس اجيت اليوم   لزيارة المضلوم
مهضومه يخواني    مهضومه يخواني
..
اجينه بلهفه والمدمع يگاطر
يعذبنه البجي وكسر الخواطر
ونذكرك من نشاهدها المخاطر
نحشمك ياسبع ذيج الگناطر

گلبي تعب مالوم    لزيارة المضلوم
مهضومه يخواني    مهضومه يخواني
...
اجيت وجم حرگ بيها عباتي
احامي عن حجابي وعن بناتي
ويمك انتحب واعرف غلاتي
رجعت مگبعه بكل نايباتي

يمك ننوح نحوم   لزيارة المضلوم
مهضومه يخواني    مهضومه يخواني

..
يليت تفكه گبرك يابوفاظل
وذا تنهض تناضر للمحامل
عكب عينك رجعنه اعله الهزايل
احشمنك يبو حلو الشمايل

ردتك يخويه ادكوم  لزيارة المضلوم
مهضومه يخواني    مهضومه يخواني
..

انه زينب يخويه انه الحنونه
اجيناكم يهلنه استقبلونه
انضرو لهل الوضع وشاهدونه
اشجره اعلينه العده لمن خذونه

يوم السبي ميشوم      لزيارة المضلوم
مهضومه يخواني    مهضومه يخواني
..
رجعنه وعاودينه بهل الضعينه
عله ضهور السحب لمن اجينه
رجعنه بصوت نصرخ ياولينه
رجع زين العباد مگيدينه

بحبل السبي مهضوم     لزيارة المضلوم
مهضومه يخواني    مهضومه يخواني
...
علي محسن الفرطوسي

https://youtu.be/v1MjF353EEM

مشايه || اداء ملا يوسف الطليباوي || للشاعر علي محسن الفرطوسي

ليالي استشهاد الامام الحسن المجتبى ع والسيده رقيه ع 1441هـ - 2019 مـ
#هيئة_انصار_الامام_الحسن_المجتبى_ع
المركزيه / بغداد
اخراج : تيسير السوداني
مونتاج وتنفيذ : سجاد عباس العكيلي
مكساج : كرار الموالي
كادر التصوير : سجاد عباس العكيلي - محمد جواد _ احمد اللامي_ محمد علي مجيد

قصيدة لستشهاد النبي
....

مااحس طعم الدفو
اله بحضان الابو
جروحي من بعدك عدو
من غيابك  من غيابك

*****

الابو خيمه ويفيي اعله بيته
ولي فاكد والده الدمعه هويته
الجرح يلجم بالجرح من فاركيته
ضيعت طعم الفرح من ضيعيته

جرح مايشبه جرح
وردة ومضيعه صبح
بعدك يحن لي  منو
من غيابك   من غيابك

*****

الي احباب اشكثر صرت افتقدهم
اختنگ واشتاگ لشمت عطرهم
بكل حياتي والله  ماالگه مثلهم
الدنية ماتت من شفت ذابل وردهم

روحي حنت رادته
مات كلشي بموتته
بعد ماضل شي حلو
من غيابك    من غيابك

*****

وردة ومضيعه ضواها فاركوها
الليله بياحال تصبح ام ابوها
كاعده اعله الباب تبجي شاهدوها
يامحمد جنت امها وجنت ابوها

فكدت جفوف العطف
دمع فاطم مايجف
صبح بس حيدر كفو
من غيابك   من غيابك

*****

حيدر يشيع على ضهره الشمس
حته افلاك السمه دارت عكس
يفوح عطر  الحزن كل جره نفس
فاطمه باليتم هاليله تحس

امن السمه طاح النجم
فاطمه الليله بيتم
الدنيه متغيره شكو

*****
علي محسن الفرطوسي