تدري بيه  جننتني محبتك
تدري بيه  واهسي بس خدمتك

*
عن بابك شما ابتعد   مهما عِلّه بـﭼـفي المجد
لازم على عتابك ارد    يامن ملكت اوجودي
لوماأنوح بمجلسك     بعبره اختنگ وتنفسك
احسبني اني عابسك   يابس وخضر عودي
عيشني عمري بمآتمك   المامنـﭼوي امن مخيمك
لاعاشگ ولاهايمك      وفقني اوشد زودي

ياحبيبي  وفقني اخدم حضرتك
تدري بيه  جننتني محبتك ..

*

ندري اليمد ايده لبشر     ماتبقه اله قيمه وقدر
ومديت اله ايدي بفخر   رد ايدي الي مليانه
خليني اجيك بحسرتي   بعتبتك اجري عبرتي
يمك  اطول  گعدتي        روحي الك لهفانه
منين ماانضرك سمه        تمطر حنان ومرحمه
سبحان رب السلمه         گلوب الخلق وٳجنانه

مالي غيرك  . بصايت الله وصايتك
تدري بيه  جننتني محبتك

*

مدفون سري بكربله    شارع السدره اشتاگ اله
موكب يمر او قافله     اذكر ضعن مسبيه
 گبالي يصبح منضرك    حر الشموس مغيرك
بالصحن جن يم منحرك  تبجي عليك ارقيه
ماعايش اني مصيبتك    استحي من بنيتك
مشتاكه ليك وحضنتك   وبالصحن جم علويه


بعيد عنك . ماعشتها مصيبتك
تدري بيه  . جننتني محبتك

*

وفقني مولاي الجزع     ارزقني يحسين الدمع
 وكلبي القاسي ينفجع    من يسمع اللطميه
وبمجلسك اكنس بسط    ولكل مُعزي ﭼـاي احط
خليني اتعب وانفحط       وأثواب اوزع اميه
محزم انه بخدمتك         شاغل افكاري حضرتك
ومالحضه انسه مصيبتك   ساكن بالحسينيه

ابجي حركه . لوقرو بقرايتك
تدري بيه . جننتني محبتك

*

خليني يم بابك عبد     اسكي الرايح واليرد
واني اعرف الي ينطرد   من رحمتك ياويله
مولاي فدوه مروتك     غطيني بضل رايتك
كحل عيوني بنضرتك    مديت الك اديه
وعالتل اصليلك فرض   واباسمك يلبي النبض
هنياله كلب الي حفض   اسمه وكل طاريه

اني ضايع .  دليني امشي بحرثتك
تدري بيه  . جننتني محبتك

*

اللهم صلي اعله العزاء     واعله اليحبون البكاء
يمبجي عيون السماء       حزمني وبجيني
كالو زليخه تسودنت     بيوسفها حيل تعلكت
تعبت عليه ودورت       واني ادور حسيني
اليحب محبوبه بشغف   موهين ينول الشرف
عباس ادري اطاله جف  وكل للسهم شك عيني

مقصر اني . ذنوبي ادري اذتك
تدري بيه . جننتني محبتك

***

علي محسن الفرطوسي

 

بخيلهم وصلوني .. عالجمر مشوني
      والخيام أمحرگه ياخويه
...........
روحي طلعت من كهفها أدخيلك
لجل عيني خويه أجل أرحيلك
العزيزه اختك انه  وأشكيلك
انهدم عباس حيلي وحيلك

هجمت الخياله .. حسين هاي اطفاله
              ياخويه
.........
اني خوفي عل الصغار امن الجمر
وين اضمهم والمخيم تستعر
محيره لاراي عدي ولا فكر
بعد عباس الكمر يفتر شمر

ليتهم ذبحوني .. ولا اجو طلعوني
             ياخويه
.........
اطفال تركض عالجمر ومحيره
تصيح وينه عمنه سبع الكنطره
طلعت ابين الزلم لمخدره
ونته جثه مخذمه وفوك الثره

خويه نور اعيوني .. بسوطهم ضربوني
                ياخويه
.......
تفتر الحره اعله وحده امن الخيم
بيها ضل باقي العليل وماسلم
من لهب نار الخيم جدمه انلهم
شالته وتتنخه شيال العلم

كافلي ماجانه . . امن الخطر بعدانه
              ياخويه
.....
اى يحيرت عمري ودمعي اليصب
جم جرح من كربله وسط الكلب
خويه متني بغيبتك ضل ينصرب
وبثيابي نار المخيم تشب

فوك نار اخيامي .. تمشي هاي اجدامي
        ياخويه
....
علي محسن الفرطوسي

يروى انه عندما ادخلوا السبايا على يزيد لعنه الله ...
أعطوه راية جيش الامام الحسين ،ع، فلاحظ عليها كثرة ضربات السيوف في كل مكان ماعدى مكان قبضة اليد...
فتعجب يزيد من كثرة الضربات في عمود الرايه وقال من كان يحمل هذه الرايه لقد دافع عنها كثيراً وتحمل كثيراًمن هذه الضربات...
فقالوا له كان يحملها العباس ابن علي ابن ابي طالب ..
فقام يزيد من مكانه وقال قولته الشهيره ....أبيتَ اللعن ياعبّاس!!! يعني مثلك لا يلعن يا عباس هكذا تكون الرجال
السلام على قمر بني هاشم

ياأول عشك بالمهد ناغاني
وياأول حبيب الدرت وجهي اعليه
شفته بعين كلبي وهوه شافاني
هوه العنده مثلك والله مايحتار
من تضكني الدنيه اشوفنك وطن ثاني
ياسر انته عندك واملكت هالناس
كلها تصيح حب حسين جناني
ياحضن الامومه وياحنان الاب
شما ابتعد عنه يمه تلكاني
انه بحجم الذبابه شما كبرت بيوم
بس حسين يمه ملك سواني
اسولفلك شعر وحتار شكتب بيك
ونته كل عضو من اعضاك رباني



... يااباعبدالله دخيل مروتك

ركضت وشافتها عيون الحرام
والمثلها شلون تطلع حافيه
اخت ابو زنود الثجيله والغيور
خيمها متوجره بعد ماطافيه
الليله زينب مالهه واحد كفيل
يامسية الشوم موش العافيه
#علي_محسن_الفرطوسي

مشايه / وي الامام المنتضر
مشايه  / لاهمنه خوف ولاخطر

*********

طالع بهاي المسيره .. بدمعة عيوني الغزيره
بكلبي حب حسين ديره .. مملكه وكلش جبيره
عشك مايوجد نضيره .. انه شيعي وكلي غيره

مجنونه مجنونه /  بكل خطوه يصيح الكلب مجنونه
لعيونه لعيونه     /  فده هلي وكل دنيتي لعيونه

*********

عايف اهلي والحبايب .. كلبي بحبه انه ذايب
شكرن لكل المواكب .. طفل يخدم ويه شايب
رغم كل هاي المتاعب .. الاجر يم ام المصايب

تحميهم تحميهم /  ام الخدر بت حيدره تحميهم
تنجيهم تنجيهم /  يوم الحشر من اللضه تنجيهم

*********

شيعه عالموعد اجينه .. هالمشي واجب علينه
المهدي يمشي وي مشينه .. كل تعب مايضل بينه
جينه نواسي الحزينه .. رجعت بذيج الضعينه

يدروني يدروني / بعيوني مرسومه الخيم يدروني
خلوني خلوني  / ارد اشعر بذاك التعب خلوني

*********

معتني وبجفوفي رايه .. عاشة بروحي السبايه
درب ابو اليمه هدايه .. الله خصني بهل الولايه
ماإهاب امنل المنايه .. حسين عودني اعله هاي

ماعوفه ماعوفه /  حسين سواني ملك ماعوفه
بجفوفه بجفوفه / وبخيره عايش للابد بجفوفه

*********



للشاعر علي محسن الفرطوسي

قصيده للمشايه
........

نبض الگلب كل خطوه اخطيهه   حسيناه
طول الدرب كل خطوه اخطيهه   حسيناه
فدوه انه ٳروح الونك   مايسوه عمري بدونك

***********

لمعشوگي كاصد كربله ودمعي يهل
ياناس سودني الهوئ ولا ماٳمل
مجنونه وتباهه على اهل العقل
ملهوفه روحي الگبتك ﭼـايمته اصل

عاشگ وسولف بالدرب تسمعني وياه
هوه حياتي ودنيتي وينساني حاشاه
واني افتخر مجنونك     مايسوه عمري بدونك
    
***********

سودني حبك بيه شمسوي الهوه
عطشان گلبي ومن نهر عشگك روه
امشيلك وشايل الك بيدي لوه
ياسر حياتي ونشٲتي طف نينوﯼ

يل مانسيتك ونته ماتنساني يحسين
الحمدالله إتوفقت وي الي ماشين
فدوه رحت لعيونك     مايسوه عمري بدونك

***********

كربله ياكعبة عشق بيها اغله احباب
سرﭺ عجيب بكل سنه آتجمعين الاقطاب
مشايه جينه وكاتب حسين اعله الابواب
فاتح مضيفي بكل وقت للطالع وطاب

ياهله بزواري الاجوا گرولي العين
صدري مضيف استوعب الاف الملايين
واني صرت مرهونك    مايسوه عمري بدونك

***********

اذن اذان الاربعين بصحن عباس
من كل مكان تعنتك تتوافد الناس
ويه كرُيات الدم انته اويه الانفاس
وكل الحواس الخمسه منك تاخذ حساس

ٳمحزمه الناس الك شيب اويه شُبان
ياملجٲ لكل الديانات وايه الاوطان
صرخات الي يكصدونك    مايسوه عمري بدونك

***********

الحمدالله خادمك شاءت الاقدار
والعنده مثل حسين بالدنيه ملك صار
يوم الحشر ماتنفع اموالن ولا انصار
ينفعنه بس حسين واحنه اله زوار

خطواتي ترتيلة عشگ واتليلك ايات
يالطولك بطول الارض وعرض السماوات
كل البشر يردونك    مايسوه عمري بدونك

***********
علي محسن الفرطوسي

قصيده للمشايه
..........

خطواتي تتسارع الك يبنَ فاطمه
يحسين جيت اتوسلك  يبنَ فاطمه
محبوبي محبوبي حسين

....

انه اول آصياري وصرت مجنونك
ماتسوه حياتي حسين من دونك
جل  الخالق السوه اليخدمونك
حته  المايلين  يلين  لعيونك

محبوبي محبوبي حسين

.....

المحبس ماله قيمه الماأله شذره
بلايه الماي خشبه تصبح الشجره
واني وياك مو يومين الي عِشره
 وعرفت المايحبك موبشر صخره

محبوبي محبوبي حسين
...

ربي وفقني لخدمته بكل دعائي
وكل سنه امشيله بنوحي وبكائي
اني جندي لسيدي وصاير فدائي
كل سنه ابابه اروح اعقد ولائي

محبوبي محبوبي حسين

...

الطير مهيوب بجناحه وريشته
واني مهيوب بحسين وخدمته
خادمك  متعني  بيده  رايته
بعزمه يوصل للحسين وحضرته

محبوبي محبوبي حسين
...

المايشوف الشمس بعيونه العمه
بالنجم والقمر كشختها السمه
الكاع لوله حسين يكتلها الضمه
المشالك خطوه فرح فاطمه

محبوبي محبوبي حسين
....
علي محسن الفرطوسي

يارمح راس الذبيح ... أعله هونك لايطيح
يشبح أبعين الكفيل ... بهيده لورايد تميل
                   *
      يارمح شايـل سـنـانك أبـو الـغـيـره
     وانه جـبـتـوني بهـضـم زينب أسيره
      راسه مرفوع أَبرمح شيخ العشيره
     لاتـهـيـج جـرحـه أبـهـاي الـمـسـيـره

أعله الرمح دمه يسيح ... تلجم أبنحره الذبيح
معذب برمـحـه اليشيل ... بهيده لورايد تميل
                     *
       ياهوه العالي أعله هونك لاتجرحه
       بعده مايابس يلـﭽمه حـسـيـن ذبحه
      ﭼنت أمسيه أبسمتي وﭼننت أصبحه
       يارمح خليني أشمه وبيدي أمسحه
أرد أشمنه الشهيد ... يادهر مني أشتريد
معذب أوياه الدليل ... بهيده لورايد تميل
               

       يلي شايل راس أخوي أبهيده أمشي
       لوتـحـركـه ويـﻠـﭽـم يـنـضـر الـوشي
       يارمح بـس نـزله ألـيه وأخـذ كـلشي
      من بعدهم اخوتي الناكه عرشي
والجرح ماضن يطيب ... يلـﭼـم أبراس الحبيب
بـﻠﭽمته أصراخ وعويل ... بهيده لورايد تميل
                      *
      ياشمس غيبي أعله راس أحسينه
      هـذه راسـه المرتفع وجسمه وينه
      لاتطولين أعـلـه جـسـمـه أتغيرينه
      ولاتصدعين أعله راسه أتيـبسينه
ياشمس رداﭺ أبوي ... بهيده حرﭺ أعله أخوي
أعله الترب جسمه نحيل ... بهيده لورايد تميل
                     *
        يل تشيل الراس رمحه لاتهزه
       أجروحه خلهن نايمات ولاتفزه
       عـذباه الشـمر لـمن أجـه وحزه
       جرحه بعده حسين يدي ولاتبزه
بعده جرحه أينز دمه ... خل تشوفه فاطمه
وانه حرمه أعله الهزيل ... بهيده لورايد تميل
**********************************
  للشاعر علي الفرطوسي

 
      

ياناس اجيت اليوم   لزيارة المضلوم
مهضومه يخواني    مهضومه يخواني
..
اجينه بلهفه والمدمع يگاطر
يعذبنه البجي وكسر الخواطر
ونذكرك من نشاهدها المخاطر
نحشمك ياسبع ذيج الگناطر

گلبي تعب مالوم    لزيارة المضلوم
مهضومه يخواني    مهضومه يخواني
...
اجيت وجم حرگ بيها عباتي
احامي عن حجابي وعن بناتي
ويمك انتحب واعرف غلاتي
رجعت مگبعه بكل نايباتي

يمك ننوح نحوم   لزيارة المضلوم
مهضومه يخواني    مهضومه يخواني

..
يليت تفكه گبرك يابوفاظل
وذا تنهض تناضر للمحامل
عكب عينك رجعنه اعله الهزايل
احشمنك يبو حلو الشمايل

ردتك يخويه ادكوم  لزيارة المضلوم
مهضومه يخواني    مهضومه يخواني
..

انه زينب يخويه انه الحنونه
اجيناكم يهلنه استقبلونه
انضرو لهل الوضع وشاهدونه
اشجره اعلينه العده لمن خذونه

يوم السبي ميشوم      لزيارة المضلوم
مهضومه يخواني    مهضومه يخواني
..
رجعنه وعاودينه بهل الضعينه
عله ضهور السحب لمن اجينه
رجعنه بصوت نصرخ ياولينه
رجع زين العباد مگيدينه

بحبل السبي مهضوم     لزيارة المضلوم
مهضومه يخواني    مهضومه يخواني
...
علي محسن الفرطوسي

https://youtu.be/v1MjF353EEM

مشايه || اداء ملا يوسف الطليباوي || للشاعر علي محسن الفرطوسي

ليالي استشهاد الامام الحسن المجتبى ع والسيده رقيه ع 1441هـ - 2019 مـ
#هيئة_انصار_الامام_الحسن_المجتبى_ع
المركزيه / بغداد
اخراج : تيسير السوداني
مونتاج وتنفيذ : سجاد عباس العكيلي
مكساج : كرار الموالي
كادر التصوير : سجاد عباس العكيلي - محمد جواد _ احمد اللامي_ محمد علي مجيد

قصيدة لستشهاد النبي
....

مااحس طعم الدفو
اله بحضان الابو
جروحي من بعدك عدو
من غيابك  من غيابك

*****

الابو خيمه ويفيي اعله بيته
ولي فاكد والده الدمعه هويته
الجرح يلجم بالجرح من فاركيته
ضيعت طعم الفرح من ضيعيته

جرح مايشبه جرح
وردة ومضيعه صبح
بعدك يحن لي  منو
من غيابك   من غيابك

*****

الي احباب اشكثر صرت افتقدهم
اختنگ واشتاگ لشمت عطرهم
بكل حياتي والله  ماالگه مثلهم
الدنية ماتت من شفت ذابل وردهم

روحي حنت رادته
مات كلشي بموتته
بعد ماضل شي حلو
من غيابك    من غيابك

*****

وردة ومضيعه ضواها فاركوها
الليله بياحال تصبح ام ابوها
كاعده اعله الباب تبجي شاهدوها
يامحمد جنت امها وجنت ابوها

فكدت جفوف العطف
دمع فاطم مايجف
صبح بس حيدر كفو
من غيابك   من غيابك

*****

حيدر يشيع على ضهره الشمس
حته افلاك السمه دارت عكس
يفوح عطر  الحزن كل جره نفس
فاطمه باليتم هاليله تحس

امن السمه طاح النجم
فاطمه الليله بيتم
الدنيه متغيره شكو

*****
علي محسن الفرطوسي

كلشي شاهد عن مصابي ونايباتي
هنا خيمنه حتركن وركضن بناتي
عمي جابر عذبوني   حرمه والوادم ولوني

..
عمي ياجابر اسولف وانته تسمع
صعبه حرمه ابين ناس اجناب تطلع
العصر من ركضيت جمره برجلي تلسع
وسوطهم من ضهري احسن لحم يشلع

جم يتيمه ركضت وركضو وراها
عثرت سكينه وشمر يصرخ اجاها
صاحت ارحمهن امتوني    حرمه والوادم ولوني
..
 الحجر اتاذي ياجابر عثرته
عذباني هوايه التل من صعدته
جني مو زينب يعمي من نزلته
اخذ كل حيلي وبقتلي بس حسرته

اسمعة واحد يكلي وين ترحين
بيدي اكيدج بالحبل يااخت الحسين
عمي ياجابر اجوني    حرمه والوادم ولوني
...

عمي دخان الخيم ضيع بناتي
حرت احاميهن يجابر لو عباتي
حرمه اني وجيشهم من كل جهاتي
هذه اليسبني وهذاك ايطگ خواتي

بعيني شفته الجر سكينه من هدمها
رمله طاحت عالوجه من كد المها
امن الرمل راحن عيوني    حرمه والوادم ولوني
...

هنا رقيه حاصرتهه نار الخيام
تشتكيلي امن الجمر داستها الاجدام
هنا سنابك خيلهم داست الايتام
جلجل الليل وعله تراب وحصى انام

تغيرن من التعب جابر خواتي
صارت الهن خيمه ياعمي عباتي
لو يجون الفاركوني     حرمه والوادم ولوني
..
عالهزل للشام رحنه مگيدينه
عمي بحبل السبي معذبينه
حسين راسه عالرمح ينضر علينه
جرحه ينزف ابذبحهم لاﭼـمينه

حين طاحت طفله ياعم من ضعنه
دار عينه وعالرمح  ينضر وضعنه
ضاعو اهلي وضيعوني    حرمه والوادم ولوني
...
علي محسن الفرطوسي

الله يشهد مانسيتك
جيت المذنب اجيتك
ولو بس بالضيج اذكرك
بذنبي كل يوم اني اجرحك .. يمهدي يمهدي

**

اتمنه لولحضه اشوفك بيها كلشي احجيلك
اعتذر من كل جرح وذنوبي التهد حيلك
جبت عمري بروحي افكر ناسي ماادعيلك
ادري جروحك هوايه وغربه يمطر ليلك

ماتعزيت بعزائك
ضحكتي تعاند بكائك
جبل من ضيم اعله صدرك
بذنبي كل يوم اني اجرحك .. يمهدي يمهدي

**

امن إهلي جم يوم  ابتعد اشتاك لهلي وناسي
اذكرهم اني بالاسم وعذرني لسمك ناسي
المفروض اعيشنك وطن وتنفسك بنفاسي
يالمهدي خجلان اعتذر ماشلتك اويه حساسي

ماشلت هم لغربتك
دمعي ماهل لدمعتك
بالخطاء يامهدي اكسرك
بذنبي كل يوم اني اجرحك .. يمهدي يمهدي

**

دفتر اعمالي يمهدي ادنك امن تكلبه
يم امام العصر اوكف مقصر اوياه صعبه
بكل فرض واجب اندبه امن اسجد اعله التربه
المهدي محتاج الدعانه عمره عاشه بغربه

شنهي اخسر لواندبك
واجبي شي اني احبك
المفروض والواجب انصرك
بذنبي كل يوم اني اجرحك  .. يمهدي يمهدي

**

عفت كلشي واعتنيتك كله لجل عيونك
اكثر امن جروحك ادري ناس الي يجرحونك
واني اولهم يمهدي ذنبي هد متونك
اعلن التوبه اعله بابك يابوصالح عونك

اني بتقصيري اخبرك
اعمالي يالمهدي تذبحك
واني المفروض انصرك
بذنبي كل يوم اني اجرحك .. يمهدي يمهدي

**

واكف ابابك امامي مكور اباهاتي
الذنوب اثكال مهدي و هدلن جتافاتي
جفوفي طبعت فوك خدي وكِثَرَة صفناتي
انته جرحك ادري اكبر تصيح ياعماتي

عالهزل مجتوفه عمتك
طالت اعله الطف طلعتك
الدمعه والحسره تصبحك
بذنبي كل يوم اني اجرحك .. يمهدي يمهدي

**
علي محسن الفرطوسي

ياعلي ياعلي صرخت وره الباب
ياعلي ياعلي كل همي الاحجاب
...

فازع الشيطان وجيوشه اعله بابي
الغوث ياحيدر صحت نار بثيابي
توكع الدنيه اذا يوكع حجابي
نارهم يابل الحسن خطفت شبابي

ياعلي ياعلي  وجهي انصاب
ياعلي ياعلي كل همي الاحجاب
...

طاح محسن ياعلي يم عتبت الدار
صدري من العصره نابت بيه بسمار
لذت منهم وشتعل بابي علي نار
انصطر وجهي ونزف دم أمن الانضار

ياعلي ياعلي  هالجرح ماطاب
ياعلي ياعلي كل همي الاحجاب

...

الوفيت اوياهم انته مايفون
الجنت راعبهم علي بنضرات العيون
تمرجلو يم بابك وصارو يصطرون
وين حيدر ياعلي اسمعهم يصيحون
ياعلي ياعلي  صدر الوفه نعاب
ياعلي ياعلي  كل همي الاحجاب

....

من تغسل الحره بفيض الدمع
بهيده لاتلجمها مكسورة ضلع
ذابت الزهره مثل نار بشمع
من دفعها الجاني الخد منصفع

ياعلي ياعلي  جسم ام حسن ذاب
ياعلي ياعلي كل همي الاحجاب

...

يا علي بفكد الحبيبه  الله يصبرك
يا علي بهاي المصيبه انكسر ضهرك
فاطمه لاذت وره الباب اوتنطرك
يا علي بلي جره رادت تخبرك

ياعلي ياعلي  وينك يبو تراب
ياعلي ياعلي كل همي الاحجاب
...

علي محسن الفرطوسي

قصيدة لام البنين عليها السلام
......


گلب ام اعله الضنه ينزف حنين
وگفت اعله الباب تبجي ام البنين

.....
توكف اعله الباب كل صبح ومسه
نعمه النسيان لاكن مانسه
كلب امهم جمره اعليهم مسه
تنعه ونشغتها يوليدي حسين

...

تنعه ومن تنعه تفسر الصخر
اربعة الشبان راحو بالسفر
لوجبل عدها الكلب جان نفطر
فاكده والفاكد يحب الونين
..

تكعد بدار الولد وتعاتبه
تگله يوليد كسر ضهري الربه
يمه ياعباس جنت امحسبه
من اموت بجفك اتغمضلي عين

..

يمه اخذ بيه الكِبْر ماعدي حيل
ومن اموت لنعشي ﭼـا ياهو اليشيل
الضِْنَه گالو حِمل اهله يشيل
وانتم بطف كربله امبضعين

...

اوكف اعله الباب وانضر عالدرب
لاخبر لاطارش ايسر الكلب
بحسرتي وخيبة امل للبيت اطب
ورگتي يبسة وطحنتها السنين

...

موتي گرب والعمر راح انتضار
ودمعتي بخدي تصب ليل ونهار
اني امكم اعتب ودلالي صار
شمعة وحركتها ﭼـلمة يمه وين

.....
علي محسن الفرطوسي