أصيح اخذوني .. تغير لوني
دمع لوجمره .. التچوي جفوني

**
يهل ماشين ألمن ضلتي لوحدي
مثل جمره المدامع تاكل بخدي
ولف بالدنيا غير الأهل ماعندي
صحت والحادي چن مايسمع ويحدي

تگيله جروحي .. تبعته بنوحي
يبويه ادخيلك .. أصيح اخذوني


**

عمامي وكل هلي شالو فرد شيله
وحشه الدار ضلت ياهو الشكيله
وي ريح اليهب مرسول اوديله
ثگيل افراكم لا ما . ألي حيله

اريد اوياكم .. صعب فركاكم
بدمعتي التجري .. أصيح اخذوني

**

احط ايدي أعلى خدي وعيني ألك تدمع
دواي بشوفتك يا بويه من ترجع
بدرك يالرحت يايوم إلي يطلع
عفت طفله وعليله بغربه تتوجع

المرض آذاني .. أون خلاني
اشوفك يمته .. أصيح اخذوني

**

اضن مامنها رجعه سفرتك هايه
عطشت النضرتك وينك يبو الرايه
عيوني ياگمر كل وكت بچايه
تعال وعوف شاطي العلگمي ومايه

ردت جفينك .. أو نظرة عينك
التعب ماخذني .. أصيح اخذوني

**

ردت منك خبر وطروش تلفيني
من كثر الدمع بويه نطفت عيني
ياهو الگاه لرض الطف يوديني
تعال مروتك المن مخليني

اعطشت لطيوفك .. تمدلي جفوفك
يكسرة خاطر .. أصيح اخذوني

**
علي محسن الفرطوسي

عون ماوصيك يمه بخالك

.....
يبني شد الثامك لاتدنگ هامك
جيوشهم گدامك روي دم صمصامك
خل ترف اعلامك يبني ثبت اجدامك

الحرب حسبه وفضها انته ابالك
عون ماوصيك يمه بخالك

.....

گوم هز أركانها الخيل شد اعنانها
كربلاء وميدانها تنتظر شجعانها
الحرب كف اردانها القاده گص السانها

يبني يازلمه بحرب يدنالك
عون ماوصيك يمه بخالك

.....

خالك أو يستاهل وحده بالطف نازل
يبني اگصد قاتل روح ندم العايل
بهل الحرب متفائل دمع خصمك هامل

الزلم تبجي خلها كون اگبالك
عون ماوصيك يمه بخالك

.....

كربله هز گاعها وانته من اسباعها
الزلم هيج اطباعها ماتهم بوجاعها
اتحزم بمصراعها الروس ياقلاعها

يرد جثه الگرب يم اخيالك
عون ماوصيك يمه بخالك

.....


....
الحرب هاي اسيادها تشيمت بولادها
عون سيفك رادها وضيعت مشرادها
الموت حل ببلادها بالعرك ميعادها

ناس تحجي لناس عن أفعالك
عون ماوصيك يمه بخالك

.....
علي محسن الفرطوسي

حشمت خلف الضعن
يبني ارجع للوطن

**

وينه عباس اصيحه بدمع عيني اليصب
درب الضعون خذاهم جرحني هالدرب
جفني ذبلان تركته يسباح الگلب
اربع اولاد هجرهم يهل الوادم صعب

عيوني بالدمعه انعمن
يبني ارجع للوطن

**
حادي العيس خذاهم حده بدرب الخطر
مني ماخذ بنيني شمس تضوي وگمر
كسرة العود عليهم أحس گلبي انكسر
مني شيريد حرمني يهل ناس الدهر

شموعي بالدار انطفن
يبني ارجع للوطن

**

رايده أخبار تجيني على الباب اوگفت
گلبي محتار يعباس يبعد أمك صحت
من الطفوف يعودون بحلم ملگه عشت
غير الجروح والنياح بعدكم ماشفت


مارحم بيه الزمن
يبني ارجع للوطن

**
ريحة احباب على الباب اشم وكت العصر
اركض بنوح والجروح مثل لفحة جمر
والصبر زين يگولون لجن ماضل صبر
البيت الي يفارگ اعزاز مثل وحشة قبر


گلبي بالفرگه امتحن
يبني ارجع للوطن

**

عميه العين والدموع اثرها اعلى الوجن
مجره نهران عالخدود أثر من الحزن
بنار الغياب والأحزان يالولاد امتحن
من يجي الليل بالدموع جفن زاعل جفن

زاعل عيوني الوسن
يبني ارجع للوطن

**
علي محسن الفرطوسي

عيني لدروب الأهل مشبوحه
بويه بسيف الهجر مذبوحه
.....

وداعت الله من گلت وحدي ضليت التفت
عالضعن من حشمت واياك اروحن حسبت
بعيني عبدالله شفت بجفه يوميلي ومتت
امشي اهز مهده ردت بليل هجرك مانمت


صحت يختي يارقيه بنوحي
عيني لدورب الأهل مشبوحه
....

أنته أبو گلب الحنين مخلي بنتك بويه وين
ليا عذاب ويا ونين ردلي خل تغمضلي عين
بعالي صوت اصرخ حسين ياهلي يل راحلين
محسبه تگلي تجين بضعن اخوتج تصعدين

بنضرتك يحسين تشفه جروحي
عيني لدورب الأهل مشبوحه
....

عودت گلبي عليك لأني اندل حته اجيك
حسين بس مدلي اديك دوه اجروحي بويه بيك
كون تنباع اشتريك ليش بويه معطشيك
بكربلاء امعذبيك وطن بس امغربيك

بصوت طفله حشمت مذبوحي
عيني لدورب الأهل مشبوحه
....

الريح لو حركلي باب حسبت جيت احباب
جفني من دمعاتي ذاب عشت كل عمري بمصاب
بويه مااحمل غياب بروحتك شفت العذاب
لاتضنه جرحي طاب بالگلب هذا الصواب

علگت رايات فوك صطوحي
عيني لدورب الأهل مشبوحه
....

ماترد لمت هلي. إلها مشتاگه وعلي
اخبار ماوصلت إلي بويه فارغ منزلي
صوت حزني يعتلي بجرح دلالي ابتلي
همومي ماضن تنجلي حسين جرحي الأولي

من هجركم راح تطلع روحي
عيني لدورب الأهل مشبوحه
....
علي محسن الفرطوسي

ارد اروحن للكفلهه اضعوني
وين وين العلگمي دلوني
****

گلبي ملهوف الجفوف سمعت أمگطعه
ياضوه العين الحسين گصد للمشرعه

عيني ألك بچايه وينه راعي الرايه
راح حامي ضعوني للفرات ومايه

ماي ماي الصوت من ضعوني
وين وين العلگمي دلوني

****

جفني همال والعيال تصد صوب النهر
وينه عباس ينوماس وصل لينه الخطر

أخذ روحي بطلعته والعطاشه نادته
سالم ايرد لينه ترف بيده رايته

راح راح ونزل دمع عيوني
وين وين العلگمي دلوني

****

جرحي ماطاب والمصاب مثل جمره استعر
جفني مشبوح الجروح حمل يكسر ظهر .

حشمت ياكافلي الكمر ياهيبة علي
انتظر يلفيني يكلي يختي ادللي

نار نار غيابه خاطف لوني
وين وين العلگمي دلوني

****

شلي بالماي يوفاي اريدنك ترد
وين أبو الجود والزنود جِرح گلبي الفگد

الماي جارح خاطري جروحي مقتل تنقري
الرايه وي راعيها للشريعه ناظري

صاح صاح شجم طفل رووني
وين وين العلگمي دلوني

****

لوني مخطوف والطفوف جرح يچويني
راح عباس والارجاس يخي تاذيني

من بعد ذاك الخدر وصل لحدودي الشمر
النار وسط خيامي وجدمي يسحك عالجمر

خيل خيل وناسهم شتموني
وين وين العلگمي دلوني

****

بعد الخدور يعاشور اعيش املوعه
عفت الاعضيد بلا أيد وگع عالمشرعه

واني امشي لوحدي شمر بضعوني ايحدي
من بعد خواني الشام جرحي او موعدي

ليش ليش اخواني ماحضروني
وين وين العلگمي دلوني

****
علي محسن الفرطوسي

دمعي هملته .. گلبي كسرته .. بهذا السفر
عذبوني ... ونتظرهم
ماأجوني .. من سفرهم

**

اني أم ضعن الثكاله وإني أم دمع اليسيل
راحو أولادي ابضعينه والدرب كلش طويل
حرمه خلوني بعذابي ومابقه بداري خليل
ريجي فكيته بدمعتي وعاشرت طور العويل

اربع بنيني .. ماضن تجيني .. من كربله
ياحسرتي .. روحي عدهم
ماأجوني .. من سفرهم

**

أربعه من داري شالو راحو بضعن الحسين
عيني ابدرب الخذاهم وبيتي ترسيته ونين
تفارگينه بهل السهوله والدمع يعميلي عين
اكتب اعلى الدار اخذني يمه يل گلبك حنين

موتي بغيابك .. يلجمني بابك .. أمن اتعنه ليه
ابجي ونعه .. إني امهم
ماأجوني .. من سفرهم

**
إني امهم ونتظر هم كاعده بدرب السفر
حالي مثل السعفه صاير أرجف وكلبي نكسر
كربلاء عني بعيده ومارجع منهم خبر
موديه ثلث نجوم اخبرك والمهم سالم تمر

من هاجروني .. اخذو عيوني .. شكد ناطرت
بروحي جمره .. من أهدهم
ماأجوني .. من سفرهم

**

ياهو ألي يوصل خبرهم ذبح دلالي الحزن
مثل طير وهذا حالي ليلي اخلصنه أون
بيت الأحزان اني اسكنه وماغفه لحضه الجفن
دمعتي إتغرگ وجنتي بفركة أولادي امتحن

خوفي وعذابي .. وحيرة مصابي .. دوم انتظر
من أعاتب .. حيرني امرهم
ماأجوني .. من سفرهم

**

نذر كلهم ولدي راحو والمهم سالم يعود
أدري كفال الضعيفه يفدي لحسين الزنود
اربعه وكلهم نشامه ولدي يوفون العهود
مايرد ساقي العطاشه دمعتي تغرگ الخدود

يفدي اخيته .. حافظ وصيته.. نشمي الگمر
املي جودي.. ياعطشهم
ماأجوني .. من سفرهم

**
علي محسن الفرطوسي

ضوه عيني وجفيني فدوه انطيهن لحسين
حشميني تعرفيني يازينب حان الدين
يختي وتدريني راح اوفي بديني

* * * * * *

جارحني هواي الماي والشاطي هوايه
يازينب هاي اعداي ماتشرب مايه
رايح بجفوفي الواي والجود ويايه
إني الساقي الوفاي وانطيت حچايه



من ازعل وترجل بالماي اتشب نيران
بجفي الطف ماينشف من دم هاي العدوان
الموت بجفيني راح اوفي بديني


* * * * * *

أبو راس الحار اسمي الرواي الكافل
تجري الغيره بدمي إني أبو فاضل
بالطف ماقل عزمي رديت العايل
يختي ولا تهتمي اگبالج نقاتل

يالحره والزهره يرخصلج هذا الماي
بالرايه على مايه تنذل كل هاي اعداي
ياگرة عيني راح اوفي بديني


* * * * * *

على راس الطير اسمج فنه اليدنالج
احنه اخوانج يمچ چلمه انطينالج
محروسات اخيمج درع احنه گبالج
قسمينه بضلع امج بدم ضحينالج

رايتنه بهمتنه اترف اتضل بالعالي
نضحيلج نفديلج زينب ابكل غالي
بس تحشميني راح اوفي بديني


* * * * * *

رايه وتعرفها الناس وچفي اللزماها
اعداي اتعرف العباس بالطف رعباها
صاحب غيره ونوماس وبالروح افداها
زينب يارفعة راس ماطاح الواها

بغيرتنه تحزمنه جيل تناقلها لجيل
الطف يشهد حين الهد ظهر الطف اصبح ليل
الساقي مسميني راح اوفي بديني


* * * * * *

جارحني سهم العين ولخيامي عيوني
عطشانه اطفال حسين الماي ينادوني
يازينب والچفين طاحن يدروني
عن جودي تناشد وين من يحشموني

عطشانه وحيرانه اطفال حسين يتانون
تحشمني وتندبني الماي الماي ينادون
سكنه اتانيني راح اوفي بديني


* * * * * *

لمن طحت ومجروح حسين تعناني
ياروحي شلون تروح لمن ناداني
بعدك اوگع مذبوح وتفزع عدواني
من گلبه اسمع يانوح حاير خلاني

كاسرني محيرني محني ويصرخ عباس
صب دمعه بقه ينعه يلطم شفته اعله الراس
شلون تخليني راح اوفي بديني


* * * * * *

علي محسن الفرطوسي

متغير لوني لوني لوني
ذبلانه جفوني جفوني جفوني
لوني وشكلي أتغير
رايح مني الأكبر

***

بالخيم صاحت ليلى للأكبر
يبني لغيابك والله ماأگدر
دمع عيني اعليك عالوجن من خر
للحرب رايح تهدي المنحر

عيونك عالرايه الرايه الرايه
ونطيت حجايه حجايه حجايه
عالفرگه ماأكدر
رايح مني الأكبر

***

أمك مفجوع وكفت و بحسره
تتنظر يرجع أمه منتظره
الوداع الصار عذب الحره
دعوت المظطر تدعي منكسره

گلبي لاجمني لاجمني لاجمني
وحدي عايفني عايفني عايفني
حيرني هالمنظر
رايح مني الأكبر

***

العطش والحر غير ارسومه
امن التعب شفته جروحه ملچومه
ابني خل يرجع مو محل نومه
القمر من يغيب تطفه انجومه

ماطفت ناري ناري ناري
ياعمد داري داري داري
اشذنبك تتوذر
رايح مني الأكبر

***

بنحره اشتمه بلا وعي ناديت
يبني حاجيني والدمع خليت
لكربلاء اتمنه من عسن لاجيت
الولد مذبوح وبالغرب ضليت

مومحل نومه نومه نومه
ذبلت ارسومه ارسومه ارسومه
بعدك يبني اتيسر
رايح مني الأكبر

***

العشره بثواني خِلصت بالطف
مدلله وتالي بحبل اجتف
لاولد يفزع والعلم مارف
بالحزن والنوح گلبي يتكلف

راحت زلمنه زلمنه زلمنه
بغربه يسرنه يسرنه يسرنه
تعبانه أو اتعثر
رايح مني الأكبر

***

علي محسن الفرطوسي

المأتم هويتي حبك قضيتي
دمعة عاشورك تحييني

***
لو ما خدمتك يحسين العمر ماضل إله قيمه
اخذني لعالم جروحك وفقني يبو الشيمه
جمره وماطفت لجلك بدليلي تستعر خيمه
اعطش ألك مو للماي للضميان بل هيمه

شهر المحرم عيشني مأتم
جرحك يحسين مبچيني

***

ميت واعدل بعاشور والتحييني دمعاتي
ألك يحسين أبو السجاد كل دمعي أوي حسراتي
المحرم احسب الأيام اضيع بدون وناتي
بخيمة خدمتك مهيوب وتشهد عني لطماتي

بهاي المجالس بجنوني عابس
خادم الحسين مسميني

***

مثل الطير ارد يمك تلمني شما ثگل حملي
حنين حسين اعرفنه هواي حسين فازعلي
الوذ بهيبته أو بخته واحد جنه من أهلي
إذا امرض وإذا احتار جفوفه الزاچيه يمدلي

ياناس أحبه شايلني گلبه
مجروح وهوه ايدوايني

***

حلاة الحب جرح ودموع حسين الجرح الي يهمني
بطريقك خطوه خطوه وياك بهاي دموعي كبرني
اللطم تسبيحة العشاگ لعالم جرحي تاخذني
دمعي بي مشاعر حب ارتاح ودمعي يلچمني

يجبر الخواطر دمعي اليگاطر
وتسولف بجروحك عيني

***

حرز لعيوني دمعاتي وغير دموعي ماعندي
عشت قصة غرام وياك يبو السجاد من مهدي
بمحرم انشر الرايات ويفيض أمن الدمع خدي
اصيرن شاعر ورادود وعزي القائم المهدي

جرحك يهمني وحزنك فجعني
حزنك مولاي مغطيني

***

أول كلمه اعرفها اه يحسين ومصابه
جمرة حزنك بگلبي حتى بقبري لهابه
طبع الدنيا دواره وشما دارت ابابه
ماعندي عرف غيرك حبيب ويعشگ احبابه

قصة غرامي لحسين أمامي
لبابك اشواگي توديني

***
علي محسن الفرطوسي

عطشان وشكيلك يبويه جمرة اضماي
دمك نزف مثل النبع ويعاتب الماي
گوه انگل إجدامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

نار العطش ماتنطفي لو غمض عيونه
عبد الله من ماي العذب طفلي يحرمونه
شذنبه هذه البل مهد لمن يعطشونه
أمن الماي محروم الولد بس مايشربونه

ياناس جارح جم گلب بالغاضريه
مو سهله طفلي ينذبج مابين اديه
رديته لخيامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

يل نحرك إترف ورد مو للذبح يبني
شفتك تلوج أمن العطش ضميتك لحضني
چا ليش نبلة حرمله يوليدي تفجعني
ياماي جارح خاطري بعبد الله لاچمني

ثغرك تبسم للذبح شاف السهم جاي
بدموعي رويته الولد يامكثر إبچاي
من أرتخه الثامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

فل بيده أگماطه وشبح عينه على عيوني
مابيدي حيله ولضمه يبني خطف لوني
هاي إذا مو ميت على عبد الله يلگوني
ابموتتك مية ذبح بالحومه ذبحووني

رديت أعثر والگلب مثل الجمر صار
ياكربله اشسويتي من ذبحيتي الصغار
هاي آخر أيامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

للخيمه من جبت الولد وبگلبي لچماته
عبالهن غافي إرتوه تلگنه اخياته
يابويه گعدنه الولد نسمع مناغاته
مذبوح اخوچن ماسلم صيحلي عماته

اتوسطتهن بالخيم ذبيت الاعمامه
ماتت دللول الولد لطمن على الهامه
يمكثر الآمي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

امه تشمه أمن النحر . عمته تلوليله
اخته تون مِتحِيره متعوده اتشيله
رمله تگول الهم غفه من حيلي الحيله
حته الدمع بعيوني جف بروحي ابچيله

صوتك يعبد الله گبل تضحكله خيماتي
ابشوفتك جانت يبويه تهون لچماتي
مذبوح گدامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️

أمك تهز بيك المهد اگعد يعطشان
من تنعه تفلش الگلب وتزيد الأحزان
بجفوفها تكض نحرك المثل الگطن چان
ادريك ماتحمل ذبح گلبي اني حيران

جرحي الچبير بشوفتك متغطي بدمومك
عبد الله اصيح إبلا وعي يومي گبل يومك
الطم ودگ هامي .. نحرك حچه الدامي
ويعاتب الماي

▫️▫️▫️▫️▫️▫️▫️▫️
علي محسن الفرطوسي

خدمة حسين شرف يكفيني

...

خادم حسين .. ضوه العين .. ودمعتي انطيله
على المذبوح .. حدي ونوح .. وضل ابچيله
بلطم الصدور .. اخذ دور .. الدمع ويسيله
المقتل اقراه .. على الاه .. صبح ترتيله

كون ابجيه بدمه من عيني

..

تحزمو حزام .. يخدام .. يمحله الخدمه
هذه عاشور .. بالصدور .. علامه إسمه
ابچو ياناس .. بالحساس .. على أبو اليمه
الخادم يصير .. مثل طير .. يطير بعزمه

همه أوحيل ردت تنطيني

.....

راية احزان .. بالوطان .. ألك مرفوعه
اسود اللون .. يلبسون .. بدموع ولوعه
شيعتك هاي .. يمولاي .. ألك مفجوعه
محضر العين .. للحسين .. تصب دموعه

موكبك هاذ يبعد سنيني

....

حسين محبوب .. بالگلوب .. ألك هالصوره
الخدمه عنوان .. باالاحزان .. نروح نزوره
شايب وشاب .. ألك جاب .. دمع ونذوره
بگلبه نيران .. الحزن حان .. وكلمن دوره

لمن احتار تره ينجيني

.....

ألك كصديت .. مثل بيت .. هلي حسيتك
جايب وياي .. يمولاي .. حزن ونعيتك
بمهدي ناديت .. تعزيت .. بعزاي الگيتك
دمع الجفون .. دمه كون .. إذا عزيتك

بالقبر دمعتي التحميني

......
علي محسن الفرطوسي

يابو فاضل گوم طاحت اخيامي
ياكفيلي شلون تسكت ايتامي
خويه خويه آه يا خويه

**
اخويه البيه أشد حيلي أريدنه
يرد لخيمته لا يگطع الضنه
زينب إني أريده يعود اشمنه
نكسر گلبي النهر بسلا خذاه منه

خلاني اجر حسرات من ودعاني
اضلم نهاري صار فگده عماني
خويه خويه آه يخويه

**

ها يحزام ظهري رد يخويه وياي
عفتني لوحدي محتاره بين اعداي
الأخت تحتاج اخوها أكثر أمن الماي
اجيب منين مثلك ياگمر وفاي

گمت أركض إبلا راي صوب الشريعه
شگد حشمت عباس اني الوديعه
خويه خويه آه يا خويه

**
ليلي خلصيته أبين نار وخيل
خيم محترگه ودموع الهظيمه اتسيل
صعبه اختك يخوها الناس بيها تعيل
الركض ماخله عد زينب بعد كل حيل


وينك ينور العين فگدك هضمني
هجمت علي صوبين الخيل أوصلتني
خويه خويه آه يا خويه

**
أول مره طولي الوادم اتشوفه
وكفيلي اعله الشريعه مگطعه جفوفه
غصب من كربله اخذوني للكوفه
على نوگ الهزل مشوني مجتوفه

چنت الأميره وياك هسه السليبه
هسه الشمر حداي آه يامصيبه
خويه خويه آه يا خويه

**

شحجيلك يخويه وابدي مدري منين
راسك عالرمح وتصد علينه العين
يضربوني وتصيح اطفال عطشانين
مو من التعب من الخجل ميتين

ماسلهمت عيناي لا شفت راحه
خلني وكتي احتار أمن يطر صباحه

خويه خويه آه يا خويه

**

بدفوف وشتم استقلبتنه الناس
وكلها اصيح زينب هاي اخت عباس
الخلگ تتفرج اعليه يبو الأحساس
من كثر التعب گوه إني أجر لنفاس

ياكوفه شتريدين من الفواطم
شتمونه بيج الناس ونشبع هظيام
خويه خويه آه يا خويه

**
علي محسن الفرطوسي

تربات حسين وماضاع اربانه
چن رمش وعين بـاچـر تـلـگـانه
شجعان ورفعة راس تعلمنه أمن العباس

*****

من عالم التكوين تكلفنه بيها
لرض الطف متعنين بالحب نجيها
هاي اجنود العباس الله محيّيها
فجر الحرب لو صار نلوي اديها

نكتب عالكاع من فيض إدمانه
بلحظات وداع الموت تلگانه
نوكف يمك حراس تعلمنه أمن العباس

*****

يفك ريجه بروس الگوم سيف الطلابه
نفزع عالجيش بموت مثل السحابه
صگور ونفتر ونصيد عزه ومهابه
لازم إبن مرجان ياخذ حسابه

نقسم للموت باقين وياكم
ونصيح بصوت ماطاح الواكم
تتفاخر بينه الناس تعلمنه أمن العباس

*****

كل واحد بينه يصير مثل المنايه
بالطف يحسين انصول نطوي السرايه
تترادم خيل وناس ونعلي رايه
نتروه الحب وصرار بجود السقايه

جود الرواي منه تروينه
الحب مو ماي لمن شربينه
يفوح إسمه اعلى الأنفاس تعلمنه أمن العباس

*****

خيبر بالطف تنعاد وفزعات الاشتر
وياكربله اتشهدين بهذا المعسكر
كل واحد ينعد جيش ومدربه حيدر
تشبع من العدوان كل وحوش البر

ناخذها اطراد للكوفه توصل
موقف ينعاد والجيش اتهيكل
توحدنه اعلى الارجاس تعلمنه أمن العباس

*****

قرص الشمس لو غاب انول الشهاده
مانرجع من الموت عدنه اراده
حلوه بجف العباس هاي القيادة
نحور انضحي العطشان ولازم زيادة

خاف مقصرين لنحور اشوايه
شنهو مقدمين. وگالو وفايه
مايوصلك مقياس تعلمنه أمن العباس

*****
علي محسن الفرطوسي

شاطي المنيه كاسرلي ضهري
عباس اجيتك وعيوني تجري
خيل ومنيه بالغاضريه

...
خيل وجيوش اعله النهر والموت يهمس بذني
عباس مايرجع بعد و الضهر ليل بجفني
اتوچه گمت اعله الصبر . وحته الصبر جارحني
يتكسر بصدري الهوه صار النفس يلجمني

النضره الأخيره منك ردتها
حيره اعله حيره روحي اتركتها
شفت الاذيه بالغاضريه
...
شگد شايل بصدرك عطف حته السهم تستقبله
عطشانه من شفت الأرض من دمك الوادي امتله
نهرين برض الطف جرن . جودك وعيني الهامله
صوت اللوه لمن يرف يشبه اصوات الزلزله

صوتك أسمعه تنادي لعضيدك
سيف المنيه گاطع وريدك
اصفگ بديه بالغاضريه
....

الليل اجه ومو موعده محزم وشارب صبحه
بطف كربله جروح شكثر كلمن وياخذ جرحه
نتلفت بخوف ورعب والگمر عالي برمحه
أفراگ اخونه شگد صعب طاحنه طحن الرحه

خويه اعله جرحك مزدحمه لرماح
التفكد أخوها بيا لچمه ترتاح
جثه رميه بالغاضريه
....


التمن علي كل المحن وكل ونه بسمك أسمع
من طاحت گبالي الخيم منها اعرفت ماترجع
شفت الرمح شايل جبل. أو جه النهار اتبرگع
جم حره مكسورة ضهر ومن ضلعي ونتي التطلع

راحت سبيه الجانت اميره
وماتطفه ناره شيخ العشيرة
ناري سريه بالغاضريه
....
منحور صبري بغيبتك وهب ريح جايب عطره
مرسوم جرحك بالسمه وبروحي بانت كسره
مقسوم أضل بغربتي والگلب مثل الجمره
من عدها يذوب الحجر كلما اجر الحسره

ياعيني سيلي بعد الحبايب
وياگلبي أنزف عيش المصايب

ننزف سويه بالغاضريه
....
لا عندي قوه واعتني صوب النهر وشكيلك
الخيمه وگلبي الرجف وكلشي يصيح ادخيلك
عباس رد لخيمتك من حيلي گوم انطيلك
جرحي اعله طولي وماهدأ بياعين من ابجيلك

مايهدأ وني حيلي هدمته
المثلك يكافل مايترك أخته
وسكنه ورقيه بالغاضريه
....
علي محسن الفرطوسي